þise tuo went to France, & fonden at Parys,
Als it was þar gode chance, Sir Philip sonne Lowys.
For Roberd þei bisouht of socour & mercie,
Sir Lowys failed nouht, his help was him redie.
Lowys wrote his letter vnto þe kyng Henry,
þat þei acorded better, for his luf specially.
þe bisshop of Parys þe pes þan formed he,
"If þei at his auys boþe wild paied be,
"Roberd salle cleyme all quite to Henry bifor vs here,
"þre þousand mark be skrite þe Henry gaf bi ȝere,
"þat Roberd, ne non of hise, salle ask Henry þe kyng
"þis dette on non wise, peny no ferþing.
WHAN þis barette was ent, þe bisshop tok his leue, [Recessit de Norman|nia.]
& Henry home went, to no mo wild he greue.
þe londes wild he nouht ȝeld, þat he of Roberd wan,
Bot haf þam he wilde, & hold for any man.
Sen þat Henry was gone, Roberd went to France
To Sir Lowys on one, & told him þat greuance:
& Sir Lowys þerfore bad him tille Ingland go,
To praye Henry restore þo tounes he tok him fro.
Roberd tille Ingland kam, & bisouht þe kyng
þo fees he fro him nam, restore ageyn þat þing.
Henry ansuerd nay, þerto were him lothe.
& Roberd went [F. away.] awith, with William was he wrothe.
Whan he sauh, þat Roberd for wroth turned so sone,
& no þing ansuerd, bot to wend was alle bone,
Henry mad him ȝare, & after him fulle suiþe
To Normundie to fare, & se what he wild kiþe,
