ÞAT tyme in Scotland was a mayden ȝeng, [De Matil|da bona Regina.]
As I red biforhand, Malcolme douhter þe kyng.
Malde hight þat mayden, many of hir spak.
Fair scho was, þei saiden, & gode withouten lak.
A doughter had Saynt Margrete, þat in Scotland lis.
Of þat douhter sute com Malde, þat was of pris,
& Dunkan & Edgar, þat I red biforn,
Malde's breþer þei war, of Margrete douhter born.
AFTER William men cald þe rede kyng, [De Henri|co primo.]
Henry þe coroun nam, his broþer þat was ȝing.
þe bisshop Maurice Henry corouned he,
þat tyme he did þe office, of London kept þe se.
Roberd þe Courthose to þe holy lond was went.
A Breton (dayet his `his [F. delend.] nose) for Roberd þider sent.
A Breton sent þat sond, he did for treson,
& Roberd com to lond, withouten oþer reson.
þat did Roberd trauaile for nouht, he was a file.
Noþeles þe erle of Cornwaile kept his wife þat while,
Charles douhter scho lord of Cezile,
Dame Edith bright as glas; Roberd þouht no gile,
Bot com on gode manere tille his broþer Henry.
He wife þat soiorned here, he led to Normundie.
¶ Henry wedded dame Molde, þat kyng was & sire.
Saynt Anselme men tolde corouned him & hire.
þe corounyng of Henry, & of Malde þat may,
At London was solemply on S. Martyn's day.
