"Heritage þat lyues & leues to þe eldest sonne,
"Purchaced þing men gyues, woman weddyng to mone,
"Or tille a man is strange for his seruise oftsone.
"Heritage salle men not change on purchace wise to wone.
"Roberd, þorgh our assent, þe heritage to þe lies,
"& þou, William, salle hent þe purchace at our avis.
"þus ȝour fader ȝow sette, als man of lawe was wis,
"His dede ne wille we lette, be þe martir Saynt Denys.
¶ Whan Roberd sauh & wist, how þe conseile ȝede,
To þe holy land him list, & þider gan him spede.
Whan he com at Marsille, & ouer þe se suld wend,
Philip sauh his wille, & after him gan send.
þe bode was sent to raþe, þe messenger com ouersone.
For soth it was gret skathe, his passage was fordone.
THE rede kyng William felle a faire chance,
To Saynt Poule's he cam, withouten greuance.
For erles & barons bi sond he for sent,
& alle at his somons to parlement went.
He schewed on & oþer, þat bated was þe strife
Bituex him & Roberd, & were in luf of life,
With chartre wele wreten & selid certeyn,
& wele it was to witen no chalange ageyn,
Wherfor he þam hight, if þei to luf wild drawe,
þe coroune at his myght to maynten with lawe, [Robertus Courthose applicuit in Angliam cum amore, & venit fratri suo Willelmo.]
& þat he so suld þe barons had affiance,
His kastels þei him ȝolde, with alle þe purtenance.
In þe ȝere folowand, at þe somere's tide,
Roberd com to þis land, at Douer gan vp ride.
