"Help Lady," said Waltere, "of þe þan is þis house
"þat are was prouendere, now is religiouse. [Ædificatur abbatia beatæ Ma|riæ apud Eboracum.]
To ȝorke þe com aȝeyn, & wrouht þer worschiply
Cloistre with couent pleyn a kirk of our Lady.
¶ Whan it was wrouht tille ende, þe monkes alle þre [Ædificave|runt clau|strum de Whiteby.]
To Whitby gan wende, þat standis on þe see.
þer wirke þei wild an abbeye wele to preise
In wirschip of Saynt Hilde, a kirke þei did vp reise.
þus wrouht þise monke þre, þorh þe holy goste,
Abbayes in sere cuntre, þat wikked men did waste,
& many a gode man to holy lif did calle,
þat þorgh þe lawe paien men left & lete doun falle.
AT London is William, at Lundreis takes leue,
To þe parlement he nam at Paris to Lowis cheue. [Rex venit ad parlia|mentum a|pud Parys.]
þe duze pers of France were þat tyme at Parys,
To William felle þar chance, he mad conquest of pris,
þe toun wan of Terwenne, the castelle of Malbis,
His auncestrie whilom when left it þorgh folis.
Whan William with þe lawe had seisen pleynerly,
Siþen he gan him drawe toward Normundy,
þe lond to visite, & to comfort his frendes.
He restid bot a lite, a sonde þe Inglis him sendes.
þe erle of Surrey sent Hacon Henry sonne,
He to William went, & praied him ȝit eftsonne
To com tille Inglond, or els alle he lesis,
Ageyn him wille men stond, & partie tille him chesis.
¶ William was in wehere, whan he herd þat tiþing,
In his auhtend ȝere, als he regned kyng,
