Sir Adinoth þei slouh, & alle þat þei mot hent.
Whan þei had frauh inouh, ageyn tille Ireland went.
þe erle Robert Comyn, þe West had to welde,
þat non vnto William for no þing suld þam ȝelde.
WHAN þat kyng William þo tiþinges herd say, [Multæ ad|versitates.]
To þe toun of Durham fulle fast he toke þe way.
þe bisshop to him said, [Vide Dugdalii Baronag. Tom. I. p. 54. Lelandi Coll. vol. II. p. 380. aliosque etiam Historicos nostros, qui secus atque noster rem narrârunt.] & told to him fulle tite,
þat þe Norreis purueied, to do him a despite.
For þat ilk tale, þat þe bisshop told,
þe Komyn had his bale, his lif was lightly sold.
þe lond of S. Cutbert he did serch þat nyght,
William alle apert his oste redy he dyght.
At þat þei mot fynd, to suerd alle þei ȝede,
& or Roberd wist, or þouht on suilk a dede,
Ore was his hous on fire, þer Sir Robert lay,
& brent Roberd to dede, bi þat it was day.
Now is þe Komyn dede, his haires has alle lorn,
William þam it forbede, þat held his londes beforn. [Ecce Da|nachi.]
NOW William has soiorned, & slayn alle his enmys,
& to þe South is turned, als kyng þat wan þe pris.
Tiþynges com him fulle stoute, þat a grete oste & stark,
With Harald & with Knoute, þe kyng sonnes of Danmark,
Were aryued in Humbere, & an erle Turkille,
With folk withouten nombere, þe Norreis felle þam tille.
