Tostus herd it say, þe best wild he do,
To Malcolme, þe Scottis kyng, Tostus alied to.
Tostus tok his leue, aryued in Norweie,
& how þe gamen ȝede lithe I salle ȝow seie.
In Norweie was a kyng, my boke tellis sua,
Saynt Onlaf broþer, Harald Heruegra.
He aryued in Tyne, bot sone he went ageyn,
& smote iu tille Humber, his flete alle pleyn
In an arme of Ouse vnder Ricalle lay,
On Saynt Mathew euen, on a Wednesday.
EDWYN & Morkare, tuo lordes Kumberland,
To Harald & Tostus þei gaf bataile on hand.
Harald of Norweie had folk right inouh,
A hundreth & fifty þe toþer side alle slouh.
Harald & Tostus vndir Ricalle so sped,
A hundreth & fifty to ȝork ostage þei led.
Nouht þien fulle fer to þam com a tiþing,
þat Harald was comand, neuly was mad kyng.
Of þat ilk tiþing Tostus was affraied,
& Harald Heruegra, I trow, was no þing paied.
þorgh a mede þei passed vnto Staunford brigge,
þar loges & þare tentis vp þei gan bigge.
¶ Whan Harald þider cam, & sauh alle þar manere, [Haraldus rex devicit bellum, oc|cidit [Sic.] Ha|raldum Tos|tum apud Staynford brigge.]
Tille þam smertly he nam, displaied his banere.
In þe morning it was, he mette with his enmys,
& alle þe day þei fauht, at euen he had þe pris.
Harald & Tostus boþe to dede ȝede,
þorgh Harald þe ȝong kyng, of wham I salle rede.
