Of þat þat þei had don, & þat þat suld betide
To warne þam þerfro, & fle it on ilk side.
Bot þis was ansuere ageyn, "a day þer in salle falle,
"þare wiknes is fulfilled, þer in ere waxen [Deest forsan alle.] hard.
"God has sette þat ȝere, a day þer in salle falle,
"þe Inglis salle go to suerd, to pyne þar soules alle.
"Dede & fire salle fede þe scheperdes & þare schepe.
þis vision is ȝit to drede, þink & gif Gode kepe.
¶ I trowe it is ouergone þorgh William conqueroure,
He com & slouh ilkone þo wikked men in stoure,
& sette vs in seruage, of fredom felle þe floure.
þe Inglis þorgh taliage lyue ȝit in sorow fulle soure.
Now is Edward dede, þe soner for þo affrayes.
þre & tuenti ȝere, sex moneþes & seuenten dayes
He regned in þis lond, þe date of God þan wex
A þousand, I fond, sexti ȝere & sex.
AFTER Saynt Edward, Harald kyng þei ches, [Haraldus factus est Rex.]
þorgh conseile of þam alle, & he þe scheld les
Right & in lawe, þe barons held him trewe.
Neuerles his falshed brouht vs sorowe alle newe.
Tostus, þat was exiled þorgh Harald ore I told,
He com out of Flandres, brouht an oste fulle bold.
Fro Sandwich to Lincolne Tostus ran,
Tresore alle & bestes he robbed ilk a man.
þat herd Harald, fulle kene he was & kof,
With folk out of þe South toward þe North drof.
