¶ þe kyng did samen his men, to abate Griffyn's pride,
& Harald þam bitauht ageyn þe Walsch to ride.
"Do him vnto þe suerd, withouten jugement,
"If ȝe may Griffyn take bityme at any went.
Harald went to Wales, his was fulle fre,
& whan he com þer, Griffyn was passed þe se
Unto Irland, þan comandid Harald
þo londes to destroie, þat Griffyn þer gan hald.
His tounes forto brenne, þe houses doun to breke,
& destroie þat kynde, þat ouht to him couth speke.
¶ Harald þe Walschmen did þam ilkon suere,
þat to kyng Edward faythe þei suld alle bere.
Siþen to Rotland he went, & exiled Griffyn þore,
Him & alle his heyres for þat tyme euer more.
¶ Griffyn com ageyn, whan Harald home was went,
þe folk priuely of Wales mad þer a parlement.
þei said, þat Sir Griffyn with right he was outlawed,
& Edward of Inglond had þam so gate awed,
þei said, "we wille no more, his vengeance is ȝit hote.
þei toke þer Sir Griffyn, & of his hede þei smote,
& sent it kyng Edward, & presented him with þat
Right at Glastenbiri, at his mete þore he sat.
GRIFFYN had tuo breþer, Bleoth & Ruthe Walan.
þo tuo were with þe kyng, whan he on Griffyn kan. [De fratri|bus Griflini & filio ejus.]
þerfor vnto þam tuo he gaf Griffyn's feez.
For South Wales holy þei mad þe kyng feautez.
