He went in to Wales to Griffyn, Griffyn sonne,
þese tuo a werre als Walsch men er wonne. [Haraldus factus est dux turma|rum apud Walliam.]
¶ Whan Edward hard say, he samned alle his oste.
Harald, Godwyn sonne, led þam bi þat coste.
At Herford in Wales þe ostes þer mette,
& dight on boþe parties in batailes to sette.
Harald & his Inglis biheld þe erle Algare,
þam forþouht fulle sore, þat he suld þore misfare.
þis wald þe Inglis conseile, if þei mot Algare saue,
For him þei suld biseke, þe kynge's pes to haue.
þe Inglis com to þe kyng, þer he was in place,
& specially Harald, he had þe kynge's grace.
On þe erle Algare had þe kyng mercie,
& forgaf Sir Griffyn also for curteisie.
WHAN þat kyng Edward wend to lyue in pes,
Griffyn, kyng of Wales, eft he mad a res.
He com vnto Herford, & slouh þe bisshop Ligere,
Spared noiþer preste no clerk, to dede alle ȝede in fere.
Kirkes & houses brent, nouht þan wild he spare.
þer þe Inglis had bigged, he mad it wast & bare.
¶ Malcolme of Scotland kyng ȝit on Inglond ran, [De rege Scotorum.]
þe kyng had him auanced, he was an vnkynd man.
Northumberland he brent, & wasted þat he fond.
Kirkes non wild he spare of S. Cutberte's lond.
þe bisshop sent to þe kyng, for socour him bisouht.
Whan Malcolme herd it say, no more skaþe he wrouht.
