þe kyng also suiþe ta bataile mad him ȝare.
Godwyn he diffied, & alle þat with him ware.
Grete wer þo parties, þat ferd in to þe felde.
Eldolf, bisshop of Bath, þe pes mayntend & helde.
Eldolf, þe gode bisshop, com with his clergie,
& said to kyng Edward, "Sire, we þe mercy cric
"For þe erle Godwyn, þat wille ȝeld him to þe.
"His sonnes er at þi wille, & alle þat with þam be.
þe barons said, "for þare sake, for þam þan praye we,
"þare trespas we vndertake opon alle our fee.
& þe erle com him self, mercy forto craue,
þe kyng, for his curteysie, granted þam pes to haue,
& gaf him ageyn boþe rent & lond,
Harald & Lofwyn to þe pes þam bond.
Bot Suane, þare broþer, þat died in Lumbardie,
For he slouh his cosyn, he fled þorgh felonie.
He went to þe holy lond, to do þerfor penance,
& died þer for colde in Lumbardie o chance.
THE kyng wedded a wife, þat Godwyn douhter was. [De Regina Edith.]
Scho soiorned at Romeneie, for hir fader trespas.
þe erle bisouh þe kyng, to take hir home ageyn.
þe kyng granted þat þing, to mak pes alle pleyn.
þe erle vnto þe kyng bare him siþen so wele,
& his sonnes boþe tille him war trost als stele,
Sithen in alle his courte were non so wele him with,
þei halp him at þare myght to maynten pes & grith.
