He had a sonne Harald, heyre of his tenement.
Engle his wife he drofe away, & held in peyrment.
Egyne, þat was an abbes, out of hir hous had
Maugre hire wille in hordom his life with hir lad.
Ageyn the kyng Edward, & of his to wynne,
Godwyn þe Erle to werre wild bigynne.
Harald & Lofwyn, þise were his sonnes tueye,
Douhty knyghtes þei were, after salle we seye.
Godwyn sent for frendes, knyghtes he had inowe,
þe kyng was at Gloucestre, & þiderward þei drowe.
Whan Edward perceyued, his hcrte was in studie,
How þat werre bigan on him so sodanly.
þe kyng ȝared his folk, on haste alle þat he myght.
þe erle in his askyng had no maner right.
Wherfor þe erle of Ba did Gowyn understand,
To leue alle his werre, & take þe lawe of land.
"At London at þe benke schewe þer þin askyng,
"Alle þat lawe wille, þou wynnes it of þe kyng.
THE kyng com to London, with lawe to mote in benke,
Men sauh on þe kynge's side þer was no gile, no wrenke;
& for he had þe treuth, on his side were þe mo,
& Godwyn perceyued wele, on his side were bot fo.
þerfor Godwyn & his fro London went away,
He stode vntille no more, defaute he mad þat day.
þerfor was þe dome gyuen þorgh þe Justise,
To exile þe erle Godwyn, his sonnes & alle hise.
