A þousand was þe date, & tuo & fourty.
I trowe it was for vengeance, he died so sodenly.
ALLE þe baronage at Pask afterward, [Coronacio Sancti Ed|wardi.]
Com to Wynchester to coroune kyng Edward,
Als he þat had gode right vnto þe regalte,
In Inglond was non so right heyre as he.
Whan he had regned fyue, & wele was aboue,
Suane þe kyng of Danmark sent to him for loue,
& praied him for his nauy to help him with summ,
Bataile was gyuen in þe se, ageyn þe kyng Magnum,
þat was kyng of Norweie, with wrong gan him trauaile.
Edward sent him fifty schippes, to help at his bataile.
For alle þe help þat he had, Magnus on him so ran,
& chaced away Suane, & Danmark on him wan.
Bot þis ilk Magnus lyued þer no longe.
Eft Suane, þe Danes kyng, þis lond did vnderfonge,
& eft vntille Edward Suane sent ageyn,
& praied him bituex þam þe pes wer certeyn.
Edward him granted, opon suilk a wise,
þat neuer þe Dangilde for ne non of hise,
Suld be chaleuged for man of Danes lond,
& Suane, kyng of Danmark, to þat conant him bond.
þus was þe pes granted with skrite on boþe sides,
& þe Danes gilde forgyuen, þat neuer eft bitides.
IN þis Edwarde's tyme a riche erle þan was, [De comite Godwino & Haraldo filio ejus.]
þat hight Godwyn of Kent, I red him ore in pas.
