He assigned Harald to Inglond, to had it in fee.
þus he gaf his londis tille his sonnes þre.
Seuentene ȝere was he kyng þorgh conquest & desceit,
At Westmynstere he ligges in a toumbe purtreit.
A thousand was þe date & sex & þritty, [Anno. Mo. XXXVIo.]
Whan Knoute kyng died, so sais þe story.
HARALD was curteys & strong, of body auenant, [Haraldus rex.]
To be þer kyng & hede þe lond was wele ogrant.
Hardknoute of Danmark payd not withalle,
þat he suld bere þe coroune, for he was born thralle,
He gadred of Danes folk right inouh,
& did him toward þe se, & tille þis lond drouh.
Whan he was aryued, he sent to Harald,
& said, þat a bastard no kyngdom suld hald,
Bot if þat he it wan with suerd or with lance
Of tirant or of Sarazin, þorgh douhtynes of chance.
& if he wille þe lond ȝeld, & to þe pes chese,
For he is my broþer, he salle not alle lese;
& if he wille þorgh bataile, þer to wille I stand,
& bataile bituene vs wille not be semand.
Harald was fulle, a lone day he toke,
To here what þe barons þam boþe wild loke.
¶ Vnder Southamptone was þer assemble, [Parliamen|tum suum est.]
Of Harald & Hardknoute, what suld bituex þam be.
For þei were breþer, þe luf was more sene,
þe barons portiond þe lond euen þam bituene,
Harald tille his parte suld haf alle þe Northende,
& alle þe Southside tille Harknout suld wende.
