Wharfor þe barons granted him ilkone,
Knoute to be corouned, & haf it alone.
WHAN Knoute had resceyued boþe þe seignories,
He parted þe lond in foure parties. [Knoutus regnavit per totum.]
Alle þe West cuntre him seluen he held,
Fals Edrik gaf he Lyndeseie of Lyncolne þe scheld.
Vnto þe erle Thurkille he gaf Estangle,
Northfolk & Southfolk, ficacie men Iangle.
To þe erle Uctred Northumberland he toke,
þe pes to mayntene þe suore alle on þe boke.
¶ þan tok kyng Knoute alle his homages,
þat cleymed to hold of him þer heritages.
Edmunde had a sonne, & childre no mo.
þorgh Edrike's conseile Knoute did him slo,
& tok quene Emme & wedded hir to wife,
þorgh Edrike's conseile, scho scorted his life.
¶ Knoute on a day bi his wife satte,
Of Edrike's treson scho warned him of þat.
"Listen me, lord Knoute, if it be þi wille,
"How he betraied my lord, & my sonne fulle ille.
"Whilom Eilred my lord he him bitraist to ȝow,
"& my sonne Edmunde þorgh treson he slouh,
"& if he regne long he salle haf þe same,
"He was neuer with no man, þat he ne did him schame.
¶ þe kyng one on þe morn went to London,
His ȝole forto hold was his encheson.
Knoute þouht on þat tale, þat his wife him told,
& siþen ateyned Edrik þorgh treson of old.
