¶ Whan þe kyng wende, þat pes suld forþe go,
þe fals Erle Edrik bigan eft a wo.
Tuo old gentille men Edrik did forfare,
þe ton hight Sigiferd, þe toþer Sir Morgare,
For couetise of þer londes, & seignorie þat þei helde,
& for þei were a partie smyten in to elde.
þe fals Edrik did lede Sigiferde's wife
Unto Malmcestre, hir name was Aldife.
Edmunde Irenside, Eilrede's sonne,
þat euer in þis lond stille wild he wonne,
Of þis ilk treson he herd oft speke,
& of fals Edrik fayn wild he him wreke.
He toke Sigiferde's wife, withouten his fader leue,
& wedded hir at þe kirke, Edrik forto greue.
Whan he had hir wedded, he went also quik,
& oute of alle þo londes he kast þe erle Edrik,
Of alle þat tenement, þat boþe þe brethres ware,
þat longed to Sigiferd, & to Sir Morkare. [De Edmun|do Irenside.]
NOW is Eilred our kyng fallen in sekenes,
He lies at Euesham, his abbay it es.
His eldest sonne Edmunde knyghtes gode he sekes,
Fro Douere vnto Wales þe folk tille him mekes.
& þe erle Edrik he gadred mykelle pride,
Knyghtes & serganz on Lyndesay side.
Forto slo Edmunde þorgh tricherie,
Bot Edmunde es wele warned of his felonie.
Edmunde bi messengers þe erle he diffies,
Edrik in tille Danmark to Knoute sent spies,
