Kastels suld þei bete doun, kirkes suld þei brenne,
Boþe citez & tounes, þat þei mot se or ken.
Of þe toun of Wynehestre feaute had he at wille,
Siþen he went to London, þat hated he fulle ille.
þe bode com to þe kyng, þat soiorned þer in,
þat þe kyng Suane þe toun wild he wyn.
A Danes erle, [Vulgo vocant Turkillum.] with þe Kurkille he hight,
He halp our kyng defend þe toun at his myght.
Kyng Suane gaf assaut, þe walles to assaile,
Mykelle folk he les, & tynt his trauaile.
Four & tuenti þousand in Temse alle at ones
Wer dronkled of Danes, þe Deuelle haf þer bones.
SUANE turned fro London, alle þorgh felonie,
& went to Wallyngford, to mak his maistrie.
Siþen he ȝede to Bathe, & sette þe toun on fire.
Achelmare tille him felle, an Erle of Deuenschire.
Achelmare with feaute to Suane he him bonde,
Fro Wellis vnto London alle felle to his honde.
Suane toward Denmark sped him fulle fast,
& ostage of London he had at þe last.
Ilk cried on oþer, now is Suane kyng
Ouer alle Inglond, & Eilred has no þing.
¶ Eilred is so reymed of his tresorie,
His wife & his childre he sent to Normundie. [Eilredus trausfreta|vit versus Norman|niam.]
þe bisshop of Londone he hight Sir Alphanie
Led Edward & Alfride, & Emme þat was ladie.
