þe Danes tok þat siluer, & turned eft ageyn,
& voided þe cuntre, þe folk was fulle feyn.
¶ Bot in þe ȝere after, obowen Grimsby
Eft þei gan aryue þorgh sonde priuely,
þorgh fals Edrike, þat þam þider hasted.
Lincolne & Lyndeseie þei stroied & wasted.
Fals Edrike went, pes with þam to make.
Fourti þousand pounde he did þam take,
þat non in alle þe cuntre more suld be piled.
Bot euer was Eilred fouly begiled.
¶ Whan þe kyng wende, haf pes in his lyue,
Suane of Danmark at Sandwyche gan aryue,
& brouht hider with him his sonne, þat hight Knoute.
þe folk vntille Humber to Suane gan þei loute.
Alle was þorgh Edrik, þat mykelle was to blame.
He was þe kynge's conseiloure, & did him mykelle schame.
ANE erle in þe North, Uctred men kalde,
He com vnto Gaynesburgh, of Suane forto halde,
Forto lyue in pes, & werre forto fle,
He com vnto Suane, & mad him feaute.
Of the North Suane had a partie, þe South he desired,
Ostes tille him his sonne fast þei atired.
Knoute went to þe North, Suane in to þe South,
þan was Eilred in þe wolfe's mouth.
Suane toward Oxenford went fulle smertly,
& in þat ilk toun did he krie a krie,
þat alle þat him serued, & of his meyne ware,
Man, woman & childe, suld þei alle forfare.
