¶ Whan Dunstan had thus said, bifor alle þat were þore,
& taken had his leue of barons lesse & more,
Eilred þe ȝonge kyng toward London ȝede,
A rede cloude in þe skie about Ingland gan sprede,
So mykelle blode it rayned, þe erth wex alle rede,
þe folk was affaied, & alle heuy als lede.
¶ þe toþer ȝere next of his coronment, [Ecce pri|mum tor|mentum.]
þe Danes vp aryued, Souhamptone þei brent,
& robbed Cornwaile, þe folk were alle anoyed,
þat with Norwais Kerlion was destroied.
þei com to London, & brent þe cite.
Eilred & þe barons, þat were of his meyne,
With þe erle of Herford held contek & fight,
þat þer heritage defend þei ne myght.
Als alle þis sorow & wo was in þe gynnyng, [Eccesecun|dum tor|mentum.]
Died S. Dunstan, men herd þe angels syng.
JUSTYN & Godemunde, of Danmark dukes riche,
Aryued in Southfolk & brent Ipsewiche,
Men & women slouh, & robbed þorgh þe lond,
Tille þei com to Mideweie, cuntre non þei fond.
With þe erle of Kent þei countred at Medeweie,
þe maistrie of him þei wan, þei did his folk alle deie.
þe lerid & þe lewid, þat wonned in þe South,
Sauh werre on ilk a side, þei wer in þe woulfe's mouth.
Ten pounde of gold bi ȝere for þe pes þei gaf
To Justy & Gudmund, þei tok alle riffe & raf.
To schip þei turned & went, & charged þam fulle wele,
Aryued in Danmark with robberie ilk a dele.
