He gaf to Crouland, in þe Abbot tyme Gounterc,
þre myle of seignorie, about his autere.
Auhten ȝere Edgar regned kyng & sire,
He lies in tombe in þe abbey of Glastenbire.
OF Edgar þe kyng þus fond I writen, [Ecce de mi|raculo San|cti Edgari.]
Pers telles þe same þing, at his boke may ȝe witen.
Sen four & tuenti ȝere, þat he in erth was laid,
An abbot of Glastebiri, Edward his name is said,
He did mak a toumbe, Edgar in to lay,
Bot it was ouer litelle, in alle maner way.
þei brak in tuo his schankes, to mak þe toumbe mete,
þe blode was boþe warme & fresh, þat of þe schankes lete.
þe abbot wex alle blynd, þat did his bones breke.
þe bisshop Owald herd of þat miracle speke,
Renst at at þe toumbe, he tok vp þe bones,
In a fertre þam laid a riche for þe nones.
þe date was nien hundreth sexti & þrittene, [Anno DCCCCmo. LXXIIIo.]
He was a holy man þorgh miracle was sene.
AFTER Edgare was Edward his sonne, [De Sancto Edwardo martire.]
Regnand in alle þe lond, als his fader was wonne.
S. Dunstan corouned him bifor þe baronage
& oþer bisshopes inouh, fulle ȝonȝe he was of age.
A gode man he was, & stalworth knyght als stele.
In Ingland neuer before was kyng lufed so wele,
Ne of þe folk strange non honourd so mykelle.
þe right lawes did he loke for fals men & fikelle.
