þat he suld fynd a palmere orly at morn,
At þe South ȝate, alone as he was born,
& if he wild praie him, for Jhesu Criste's loue,
He wild do þe bataile, & þei suld be aboue. [Ecce de bello inter Guydonem de Werwyk & Coli|brant.]
þat was Guy of Werwik, as þe boke sais.
þer he slouh Colibrant with hache Daneis.
Anlaf turned agayn, I trowe him was wo,
He & alle his to schippe gan þei go.
God delyuerde Athelstan of many hard affaies,
Sextene ȝere was he kyng & seuentene daies,
Siþen at Gloucestre dede euelle him toke.
Bot quik he out went, so sais my boke.
Pers can not say where he lies,
Bot as I herd telle I say myn auys.
Men say he was fonden in þe North cuntre [De fine Athelstani regis.]
At Hexham now late, I wene soth it be.
þe date whan he died of God men tellis by [Anno Domini DCCCCmo. XLo.]
Nien hundreth wynter & fulle fourty.
AFTER Athelstan þe kyng was Edmunde his broþer, [Edmundus Rex.]
þe northren did him desceit, & ches þam a noþer.
One Anlaf þei ches, & crouned him for kyng.
Alle þe North ende was in his kepyng,
& alle þe South ende tille Edmunde þei drouh.
Upon þe fals Norreis Edmunde wan inouh.
Fyue cites he wan, þat þei held for þers,
þat whilom was ancestres, fro heires vnto heires,
