Cornwalle, Lyndsay & Kent, Dorsette & Surreie.
He ligges at Wynchestre, þe soth it is to seie.
þe date of God nien hundreth, & four & tuenti mo,
Whan dede his lyfe sundred, þe folk for him was wo.
AFTER Edward þe olde regned Athelstan, [Adelsta|nus rex.]
þat was his eldest sonne, & a noble man.
þe baronage & þe clerȝie were somond to Kyngeston,
þer wes his fest holden, & gyuen him þe croune.
þe next ȝere þere after his coronment, [De Tributo Walliæ.]
þe Walsh men, þat luf no pes, on him ran & brent.
Bot Athelstan þe maistrie wan, & did þam mercie crie,
& alle Northwales he set to treuage hie.
Tuenti pounde of gold be ȝere, þre hundreth of siluer clere,
& þer to fyue hundreth kie ilk ȝere to his lardere.
Siluer for Southwales not a ferþing noke
Oþer treuage he sette, a þousand kie he toke. [Istî sunt qui moverunt guerram super A|thelstanum regem.]
¶ þe ferth ȝere of þe regne Owald a werreoure,
Constantyn of Scotland kyng was & traitoure,
Ouwer kyng of Wentland, þese þre with þer powere
Werred on Athelstan with oste fulle austere.
Bot Athelstan, þorgh Gode's graee, so with þam fore,
þei were fayn to ask pes, & feaute þei him suore.
þe tend ȝere of his regne sen he was crouned kyng,
Of Edwyn his broþer bifelle suilk a þyng.
At London in his courte with wiknes men him fond,
Athelstan did him bynd both fote & hond,
& kast him in tille Temse, whan it was most brym,
To chastise alle oþer he tok vengeance on him.
