Men sais in Lyncoln castelle ligges ȝit a stone,
þat Hanelok kast wele forbi euer ilkone.
& ȝit þe chapelle standes, þer he weddid his wife,
Goldeburgh þe kynge's douhter, þat saw is ȝit rife.
& of Gryme a fisshere, men redes ȝit in ryme,
þat he bigged Grymesby Gryme þat ilk tyme.
Of alle stories of honoure, þat I haf þorgh souht,
I fynd, þat no compiloure of him tellis ouht.
Sen I fynd non redy, þat tellis of Hanelok kynde,
Turne we to þat story, þat we writen fynde.
SON after com an erle, Alfden hight þat hunde, [De comiti|bus Daciæ.]
Aryued vp with Inguar, þat slouh S. Edmunde.
Upon þe kyng Alfrid werre son began,
Bot þorȝh þe gode Northeren slayn wer ilkaman.
Sex & fifty batailes Alfrid ouercam,
After nyen & tuenty ȝere þe dede him hiþen nam,
& sex monethes mo, þus þe story said.
At Wynchestre in toumbe in þe abbay is he laid.
þe date þat certeyn es in boke writen here,
Nouþer more no lesse, þan nien hundreth ȝere.
AFTER þis Alfride kom Edward þe olde, [Edwardus ICX.]
Faire man he was & wis, stalworth & bolde.
At London, at Saynt Poule's, toke he þe croune,
& purueied his parlement of erle & baroune.
He seid vnto þam alle, þat purueied suld it be,
þat in alle þe lond suld be no kyng bot he.
