Now lies he in schryne in golde þat is rede.
Seuen ȝere was he kyng þat tyme þat he was dede.
IN þe ȝere after, right in þe tyme of May, [Oseth, rex Daciæ, ar|ripuit por|tum in Ber|wik super regem El|fridum.]
Oseth, þe Danes kyng, com Inglond to affray.
He aryued at Berwik, in þe water of Tuede.
Priue help of þe Scottes he had at his nede,
& com fast toward þe South, grete powere he led.
Elfride & his broþere out of ȝork fled.
þei praied God specially, þat he wild þam saue,
& ageyn þe Danes help inouh to haue.
At þe poynt of þe bataile, displayed his banere,
þe kyng ȝede to þe kirke, his messe forto here.
Bot Alfride his broþer ȝede to þe bataile.
He was ouer hardy, þe Danes he gan assaile.
Discomfite was Alfride within a litelle throwe.
þe kyng herd þat telle, þat his side ȝede lowe.
He dight him to þe bataile, his folk to socoure.
God did faire miracle for Elfride þat houre.
For non of þe Danes askaped with þe life.
Bot þe Scottes kyng, þat mayntend þat strife,
Opon Elfride ran, als traytoure inferd.
Elfride he wonded with dynt of a suerd.
Sex ȝere was he kyng, with werre weldid þe scheld.
Fulle gode was his endyng, he ligges at Driffeld.
¶ þof alle þat he werred in wo & in strife,
þe foure & tuenty houres he spended in holy life.
þe ferst. viii. houres in praier alderbest,
þe toþer. viii. houres in slepe & in rest.
