Right at Wynchestre, ageyn þam gan he stand,
þe kyng þam bataile, & did þam fle þe land.
In werryng & in wo he regned fyue ȝere.
Men biried him at Schireburn, Edbald fulle nere.
þe date of Jhesu Criste was written in þis lyue, [Anno Domini. DCCCmo. LX.Vo.]
Auht hundreth wynter sexti & fyue.
AFTER Ethelbert com Elfrith his broþer, [Elfridus rex.]
þat was Egbrihte's sonne, & ȝit þer was a noþer.
Elfride þorgh heritage toke him þe coroune,
& gaf Alfride his broþer Surray to warisoune.
Tille Elfride oure kyng com tiþinges starke,
þat fyue kynges & fyue erles wer comen of Danmarke,
þat wild on him renne, & reue him þe coroune,
With alle þer grete folk, þei lay in Aluertoune.
þe kyng & his broþer, þat hight Alfrede,
Gadred folk togider, als men þat had nede,
& com to þe bataile with fulle egre herte.
þe Danes stode þam ageyn with bataile fulle smerte.
In þe passion tyme was þe first bataile,
Nene was þat ilk ȝere, grete was þer trauaile.
þe toþer ȝere, þe þrid day after Halwethurs tide,
þe Danes, þorgh Gode's grace, were on þe wers side.
For slayn were þei alle, erle & baron.
þe kyng did mak at ȝork a faire procession,
& þanked Jhesu Criste with herte fulle mylde,
þat ageyn þe paiens his lond myght schilde.
