Siþen he went to Rome, as man of holy wille,
His sonne & he alle þat ȝere with þe pape duelled stille.
þe toþer ȝere next, after his duellyng,
He went home bi France, & spak with þe kyng.
þe kyng him his douhter, hir name was Juwet,
Fulle wele on Sir Adelwolf was þat maiden sett.
He brouht hir Inglond, & siþen lyued tuo ȝere.
He lies at Wynchestre beside an autere.
þre þousand marke he gaf with testament fulle right
To Petir & Paule of Rome, to susteyn þer light.
AFTER Adelwolf, his sonne hight Edbalde, [Edbaldus rex fatuus.]
To ȝere & a half þe regne gan he halde.
Of him in holy kirke men said euelle sawe,
His stepmoder Juwet he weddid agayn þe lawe.
Of his body was no force, non for him wild murne.
Bot þus I fond in my boke, he lies at Schirburne.
þe date of Criste to neuen þus fele were gon, [Anno Do|mini. [Repone, DCCC.LXIo.] D CCCC. LXIo.]
Auht hundreth euen, & sexti & on.
AFTER Edbalde com Ethelbert his eam, [Ethelbertus rex.]
Adelwolfe's broþer, of Egbrihte's team.
He did him coroune kyng, he was a noble man,
& in his first ȝere paiens on him ran
