"& if þei Sir Frethebald haf now ouer comen,
"þe to þere remenant of þe North son salle þei nomen.
"Sir, for þis hie feste, & for þe Trinite, [Bellum a|pud Kar|ham, & rex fugam cepit.]
"Suffre vs nouht to lese, for defeaute of þe.
WHAT did kyng Egbriht? Withouten any somons,
& withouten askyng of Erles or barons,
He hied him þider suyth, &, whan he com to Tuede,
He sauh suylk oste of paiens, þat alle he was in drede.
Neuerþeles at Karham was the bataile gyuen,
þe kyng was narow holden, his folk alle to dryuen.
Tuo dukes & tuo bisshopes for euer toke þer leue,
þe kyng was alle affraied, þer dede gan him greue.
þe kynge's folk was litelle, it had no dure.
On the nyght he fled away, þat non suld him se.
Myght he neuer noure fynd a restyng place.
Right vnto Donkastre þe Danes gan him chace.
Whan he wend haf passed þo þat gan him dryue,
þan were aryued in Humber þritty schippes & fyue.
Ilkone with folk inouh, redy to bataile,
"God wate," said þe kyng, "now comes me trauaile.
¶ Dardan hight þe cheftayn of þat company, [De Dar|dano filio regis Da|ciæ.]
Sadok sonne of Danmark kyng Danesry.
þer pauillons had þei sette beside þe water of Done,
Egbriht gadred partie, & ȝared him fulle sone.
Listen now, how Jhesu Criste, for his mykelle mercy,
Agayn þe fals paiens þe Cristen stode he by.
