þe Englis of þis lond þe lordschip þei toke,
& haf it ȝit in þer hond, þe Bretons forsoke.
¶ þe ferthe sorow of þis lond com þorgh þe Danes, [Quarta plaga.]
þe folk of the North slouh, destroied þer wanes.
Siþen wan þei alle þe South, maistrie þei schewed,
& laid þer Dangilde on lered & lewed,
& left þe Inglis þe lond on a forward dere,
To pay ilk a hede a peny to þam bi ȝere.
¶ The fift sorow þer after com, whan William conqueroure, [Quinta plaga.]
þat aryued on þis lond, Harald he slouh in stoure,
& barons oþer inouh, þat died in þe feld,
þe lond lese þe armes, changed is þe scheld.
Siþen he & his haf had þe lond in heritage,
þat þe Inglis haf so lad, þat þei lyue in seruage,
He sette þe Inglis to be þralle, þat or was so fre.
He þat bigan it alle in þe geste may ȝe se.
HENRY of Huntyngton testimons þis title. [Henricus dicit.]
þe kyngdom of Westsex, he sais, it was not litelle,
Whan Adelard died þerfro, & Uttred þerto went.
Uttred in his first ȝere messengers he sent [Uttredus regnavit.]
For kynges & barons vntille his parlement,
In stede þer he it sette, þei wist what it ment.
Bot Eadbald it withsaid, kyng of Lyndesay,
He was of þe Bretons kynde, he stode of him non eye.
Uttred wrathed him þerfore, & ran on him fulle tite,
& tuys þorgh batale in felde was Eadbald disconfite.
ȝit wild he not be war þer bi, so proude he was in herte,
Tille he was wonded þe þrid tyme, & died also smerte.
