Ine was kyng of Westsex sex & þritty ȝere,
Fulle wele he ȝemed þe lond fro wo & fro wehere.
Iuor & Ini ost did he þam chace.
In his tyme to rise had þei neuer grace.
Tuenty grete batailes Ine ouerkam,
þe quene withouten childe non heyre of hir nam.
Ine went to Rome als in pilgremage, [Ine per|rexit Ro|mam, & ibi sepultus est.]
Adelard his cosyn he gaf his heritage.
The pape him asoyled in treuth stedfast,
Whan he had don his penance, he ȝald to God þe gaste.
ADELARD of Westsex was kyng of þe empire,
Of Noreis & Surreis, guyour of ilk schire.
He ne suffred neuere wrath to be aboue
Bituex kyng baron, þat ne he mad ay loue.
Alle þe Bretons he ouercome, þat wild him assaile,
& in his þirtende ȝere force gan him faile.
Tille Uttred his kosyn, a stiffe knyght in stoure,
He gaf his kyngdom, & died in langoure.
He ligges at Bathe, for þider was he born.
þe holy man Saynt Bede died a ȝere beforn.
¶ Henry of Huntyngton sen þat day & þat ȝere [Ecce de Henrico Huntyng|tone.]
To write Inglis gestes fond he non his pere.
A bisshop of Lincolne, Alisandre he hight,
Praied him to write þe gestes þat were right.
þerfor þis Henry is cald a compiloure.
He wrote þe Englis gestes whilom of honoure.
¶ þus wrote to þe bisshop Henry þe same, [De Alex|andro epi|scopo Lin|colniæ.]
He sais, þis lond hight Bretayn, þat now has oþer name.
