Capitulum secundum.
Whan þe childryn of israel were go oute of Egipt and had wonne and made soget to hem Ierusalem and alle þe londe lyggyng aboute, and noman was hardy in aƚƚ þat countrey to sette aȝens hem, for drede þat þey hadde of hem: þan was there a hille þat was cleped Vaws, þe wich hille also was cleped þe hiƚƚ of Victory: and on þis hiƚƚ þe warde & þe kepyng of hem of ynde was ordeyned and keped by diuers aspyes by nyȝt and by daye, ffor þe childryn of israel and afterwarde for þe Romayns; so þat, ȝif any pepil in any tyme purposed with stronge hande to entre in to þe countreye of the kyngdom of ynde, anoon aspyes of othir hillys aboute thorwe tokenys schewed and warnyd þe kepers þat were in þe hiƚƚ of Vaws, as by nyȝt þey made a grete fyre and by daye þey made a grete smoke. ffor þat hiƚƚ Vaws passeth of heithe aƚƚ othir hillis [ MS. hiƚƚ] in þat countreye of ynde and in aƚƚ þe eest. and so, whan any swich tokene was sey by day or by nyȝt, than anoon aƚƚ maner of men of þe countrey aboute made hem redy to aȝenstonde [These words are cut away in the MS.] ,ȝif any enemyes had come. wherfore in þat tyme þat balaam so gloriouselicℏ prophecied of þe incarnacioun of oure lorde ihesu and of þe sterre and seyde Orietur stella &c.;, as hit is aforseyde: than aƚƚ þe grete lordys and aƚƚ þe oþir pepil of ynde and in þe eest desired gretlicℏ