Capitulum xxvijm
Whan cure lord ihesu crist was styed vp in to heuen, þan he sent seynt Thomas, his apostil, in to ynde, to preche þere goddys worde; In þe wich Inde, as hit is aforseyde, þes .iij. kyngis þat tyme regnyd and were lordys. ¶ And þow hit so were þat seynt Thomas [leaf 16a] aȝens his wille ȝede in to þat londys, ȝet ȝe schulle vndirstonde þat þis was do of þe grete prouidence of god þat þis same appostil þat put his hande in to goddys syde to knowe þat he was werry god þat was aryse vp fro dethe to lyfe for saluacioun of aƚƚ mankynde, he scholde go and preche þe passioun of crist, his resurreccioun and his ascencioun to þes .iij. worschippeful kyngis þat souȝten oure lord ihesu crist in bethleem in his Natiuite and þere with ȝiftys worschipped hym; and, as seynt Gregory seiþ: Id nobis omnibus profuit quod hij Reges & hee gentes eiusdem domini nostri Ihesu Christi infanciam quesierunt & oculis viderunt et deuotissime muneribus adorauerunt & probauerunt, ¶ This is to seye: this was to vs aƚƚ a profite þat þes worschepeful kyngis and her pepil souȝten þe childehode of crist and with her yȝen siȝe hit and with ȝiftys worscheppefullich and deuoutelich honoured hit and for soþe proued hit. fferthermore ȝe schul vndirstonde þat seynt bartholemewe, Symon and Iudas, þat were cristys disciplis, were also sent in to ynde to preche þe feyȝ among aƚƚ þe pepil: for þer be many parties of ynde, and o party of ynde is more þan aƚƚ þe party of þe worlde