CHAPTER XIV
[Of the cytee of Damasce; of iii. weyes to Jerusalem, on be londe and be see, another more be londe than be see, and the thridde weye to Jerusalem all be londe.]
SEN I hafe talde ȝow of many maners of men þat dwellez in cuntrez beforesaid, now will I turne agayne [folio 50] to my way and tell how men sall comme fra þase cuntreez vnto þise cuntreez agayne. Qwha so will comme fra þe land of Galile þat I spakk off before, he schall ga by Damasc, whilk es a faire citee and full of gude marchandyse. And it es three iournez fra þe see, and fra Ierusalem fyue iournes. Bot þai cary marchandyse apon camels, mules, dromedaries and hors, and oþer maner of bestez; and þase marchandisez er broght by see fra Inde, fra Persy, fra Caldee, fra Ermony, and fra many oþer regiounes. Þis citee founded Eleazar of Damasc, þat was þe son of þe steward [þat was ȝoman and despenser, C.] of Abraham þe patriark, and þerfore was þe citee called Damasc after his surename; for he wend to hafe bene lord of þat cuntree after Abraham, for Abraham þat tyme had noȝt geten his son Ysaac. In þat place slew Cayn his broþer Abel. Besyde Damasc es þe mount Seyr. In Damasch er many welles, bathe within þe citee and withouten; and þer er also many faire gardyns riȝt plentifous of fruyte. Þer es nower whare swilke anoþer citee of gardynes and of fruyte. In þat citee also es wonder mykill folk, and it es wele walled aboute with a dowble wall. In þat citee also dwellez many phisicienes; and þare vsed sayn Paule sum tyme þe craft of phisic, before þat he was conuerted, and sayne Luc was his disciple to