Capitulum xv
ANone all the knyghtes aroos from the tabyl for to set on Balyn / and kynge Pellam hym self aroos vp fyersly / & sayd knyȝt hast thow slayn my broder / thow shalt dye therfor or thou departe / wel said balen do it your self yis sayde kyng pellā / ther shall no mā haue ado with the / but my self for the loue of my broder / Thenne kyng Pellam cauȝt in his hand a grym wepen and smote egrely at balyn / but balyn put his swerd betwixe his hede and the stroke / and therwith his swerd brest in sonder / And whan balyn was wepenles he ranne in to a chamber for to seke somme wepen / and soo fro chamber to chamber / and no wepen he coude fynde / and alweyes kynge Pellam after hym / And at the last he entryd in to a chambyr that was merueillously wel dyȝte and rychely / and a bedde arayed with clothe of gold the rychest that myghte be thought / and one lyenge theryn / and therby stode a table of clene gold with four pelours of syluer / that bare vp the table / and vpon the table stood a merueillous spere straungely wrought / And whan balyn sawe that spere / he gat it in his hand and torned hym to kyng Pellam / and smote hym passyngly sore with that spere that kynge Pellam felle doune in a swoune / and therwith the castel roofe and wallys brake and fylle to the erthe / and balyn felle doune so that he myghte not stere foote nor hand / And so the moost parte of the castel that was falle doune thorugh that dolorous stroke laye vpon Pellam and balyn thre dayes