¶ Capitulum ix
THenne they rode forth alle to gyders Kynge Mark / sir Lamorak & sir Dynadan tyl that they came to a brydge / And at the ende therof stode a fayre Toure / Thenne sawe they a Knyght on horsbak wel armed braundysshyng a spere cryenge and proferynge hym self to Iuste / Now said sir Dynadan vnto Kyng Mark / yonder ar two bretheren that one hyght Aleyn / and the other hyghte Tryan that will Iuste with ony that passeth this passage / Now profer your self said Dynadan to Kynge Mark / for euer ye be leide to the erthe / Thenne Kynge Marke was ashamed / and there with he feutryd hys spere / and hurtlid to sir Tryan / and eyther brake their speres / all to pyeces / and passid thurgh anone / Thenne syr Trian sent Kynge Mark another spere to Iuste more / But in no wyse he wold not Iuste no more / Thenne they came to the castel al thre Knyghtes / and praid the lord of the castel of herburgh / ye are ryght welcome said the Knyghtes of the castel / for the loue of the lord of this castel / the whiche hyght sir Tor le fyse aries / & thenne they came in to a fayr courte wel repayred / and they had passynge good chere tyl the lieutenaunt of this castel that hyght Berluse / aspyed Kyng Marke of Cornewaile / Thenne said Berluse / syr Knyght I knowe you better than ye wene / for ye are Kynge Marke that slewe my fader afore myne owne eyen / and me hadde ye slayne hadde I not escaped in to a wood / but wete ye wel for the loue of my lord of this castel I will neyther hurte you ne harme you nor none of your felauship / But wete ye wel whan ye are past this lodgynge / I shalle hurte you and I may / for ye slewe my fader traitourly / But fyrst for the loue of my lord sir Tor / and for the loue of sir Lamorak the honourable Knyght that here is lodged ye shal haue none ylle lodgynge / For hit is pyte that euer ye shold be in the company of good Knyghtes / for ye ar the moost