Le Morte Darthur
Syr Thomas Malory
William Caxton, H. Oskar Sommer

¶ Capitulum Nonum /

ANd in the meane whyle came sir kay the seneschal and sire Brandyles / and anone they felaushypped wyth them / And thenne within ten dayes thēne departed tho knyghtes of Arthurs Courte from these fortresses / And as sir laūcelot came by the castel of Pendragon / there he putte sir Bryan de les yles from his landes / for cause he wold neuer be withhold with kynge Arthur / and alle that castel of Pendragon / and alle the landes therof he gaf to sire la cote male tayle / & thēne sir launcelot sente for Neroueus that he made ones knyghte / and he made hym to haue alle the rule of that castel / & of that countrey vnder la cote mayle tayle / and soo they rode to Arthurs courte al holy to gyders / And at Pentecost next folowynge there was sire Plenorius and sir la cote male tayle called otherwyse by ryght syr Breunes le noyre bothe maade Page  353 [leaf 177r] knyghtes of the table round / and grete londes kynge Arthur gaf them / and there Breune le noyre wedded that damoysell Maledysaunt / And after she was called Beau viuante / but euer after for the more party he was called la cote male tayle and he preued a passynge noble knyghte and myghty / & many worshipful dedes he dyd after in his lyf / and sire Plenorius proued a noble knyght and ful of prowesse / and alle the dayes of their lyf for the moost party they awayted vpon sir laūcelot / and sire Plenorius bretheren were euer knyghtes of kynge Arthur / and also as the frensshe book maketh mencyon / syr la cote male tayle auengyd his faders dethe /