Layamon's Brut (British Museum Ms. Cotton Caligula A.IX)
Layamon

Lines 9601 through 9700

Cnihtes eoden to ræde; cnihtes eoden to rune.
     9601
radden þat heo nalden; þene castel lengere halden.
     9602
heore brugge heo duden adun; & bitahte hine Vðer Pendragun.
     9603
Þa stod al þis kine-lond; æft an Vtheres hond.
     9604
Þer Vðer þe king; nom Ygærne to quene.
     9605
Ygærne wes mid childe; bi Vðer kinge.
     9606
al þurh Merlines wiȝel; ær heo biwedded weore.
     9607
Þe time com þe wes icoren; þa wes Arður iboren.
     9608
Sone swa he com an eorðe; aluen hine iuengen.
     9609
heo bigolen þat child; mid galdere swiðe stronge.
     9610
heo ȝeuen him mihte; to beon bezst alre cnihten.
     9611
heo ȝeuen him an-oðer þing; þat he scolde beon riche king.
     9612
heo ȝiuen him þat þridde; þat he scolde longe libben.
     9613
heo ȝifen him þat kine-bern; custen swiðe gode.
     9614
þat he wes mete-custi; of alle quike monnen.
     9615
þis þe alue him ȝef; and al swa þat child iþæh.
     9616
Æfter Arður wes iboren; þeo ædie burde
     9617
heo wes ihaten Æne. þat ædien maiden.
     9618
& seoððen heo nom Loð; þe Leones ahte.
     9619
heo wæs inne Loeneis; leodene læfdi.
     9620
Longe l[i]uede Vðer; mid muchelere blisse her.
     9621
mid gode griðe mid gode friðe; freo on kine-dome.
     9622
Þa þe he wes ald mon; þa com him ufel on.
     9623
þat vfel hine læide adun; seoc wes Vðer Pendragun.
     9624
swa he wes here; seoc seoue ȝere.
     9625
Þa iwurðen Bruttes; swiðe [un]balded.
     9626
heo duden ofte unwræste; al for æie-leste.
     9627
Þe ȝet læi ibunden; in þe quarterne of Lunden.
     9628
Octa Hengestes sune; þa at Eouerwic wes inume. Page  502
     9629
and his iueren Ebissa; & his o[ð]er Ossa.
     9630
Heom biuusten twælf cnihtes; dæies and nihtes.
     9631
þa weoren weri of-læien; inne Lundenne.
     9632
Octa iherde suggen; of seoc-nesse þas kinges.
     9633
& spac wið þa wardes-men; þe hine witen scolden.
     9634
Hærcneð me nu cnihtes; þat ich eou wulle cuðen.
     9635
We liggeð here i Lundene; uaste ibunden;
     9636
and ȝe monienne longne dæi; ouer us ilæien habbeoð.
     9637
Bettere us weoren to libben; inne Sexlonde.
     9638
mid muchele richedome; þene þus reouliche here;
     9639
& ȝif ȝe wolden iwurðen; & don mine iwille.
     9640
ich eou wolden ȝiuen lond; muchel seoluer & gold.
     9641
þat a ȝe mihten riche; rixlien in þan londe.
     9642
and eoure lif libben; swa eou bið alre leofuest.
     9643
For no biden ȝe nauere ȝiuen gode; of Vðer kinge.
     9644
for nu ful raðe he bið dæd; and his duȝeðen al bilæueð.
     9645
þenne nabben ȝe nouðer; þat an no þat o[ð]er.
     9646
Ah biðenche eou ohte men; & doð us eoure mildze on.
     9647
& þencheð whæt eou weoren leof; ȝif ȝe þus ibunden leien.
     9648
& mihten in eouwer londe; libben inne winne.
     9649
Swiðe ofte Octa; wið þæs cnihtes spac swa.
     9650
Cnihtes gunnen runen; cnihtes gunnen ræden.
     9651
to Octa heo seiden ful stille; We scullen don þine iwille.
     9652
Aðes heo sworen; swiken þat heo nalden.
     9653
Hit wæs in ane nihte; þat þe wind wende rihte.
     9654
forð i-wenden cnihtes; to þere mid-nihte.
     9655
and ledden uorð Octa; & Ebissa & Ossa.
     9656
after þere Temese; tuhten forð in-to þere sæ.
     9657
forð heo iwenden; into Sæx-londen.
     9658
Heore cun heom com aȝeines; mid mucle flockes.
     9659
heo liðen ȝeond þan leoden; swa heom wes alre leofuest.
     9660
me heom bi-tahte lond; me ȝæf heom seoluer & gold.
     9661
Octa hine bi[ð]ohte; whæt he don mahte.
     9662
he þohten hider wenden; & wræken his fader wunden.
     9663
Ferden heo biȝæten; of folke vnimete.
     9664
to þere sa heo wenden; mid muchele þrætte.
     9665
to Scotlonde heo comen;
     9666
sone heo fusden alond. and mid fure hit igrætten; Page  504
     9667
Sæxes weoren ræie. Scottes heo sloȝen;
     9668
mid fure heo adun læiden. [þri]tti hundred tunes;
     9669
Scottes heo sloȝen; moni and unifoȝen.
     9670
Comen þa tidende; to Vðer kinge.
     9671
Vðer wes swiðe wa; & wunderliche ihærmed.
     9672
and senden into Loæines; to leofen his freonden.
     9673
and grette Lot his aðum; & hehte hine beon an sund.
     9674
& hahte hine nimen an his hond; al his kine-wurðe lond.
     9675
chihtes and freomen; and freo-liche heom halden.
     9676
& leden heom to ferde; swa laȝen beoð an ærde.
     9677
& he hæhte his cnihtes leoue; beon hærsume Loðe.
     9678
mid leofliche læten swulc he weoren leodene king.
     9679
For Lot wes swiðe god cniht, & hafde ihalden moni fiht.
     9680
and he wes mete-custi; æuer-alche monne.
     9681
he bi-tahten him þa warde; of alle þissen ærde.
     9682
Octa heold muche vnfrið; & Lot faht him ofte wið.
     9683
& ofte he ahte biȝæt; & ofte he heom losede.
     9684
Bruttes hafden muchel mode; & vni-mete prute.
     9685
& weoren æie-lese; for þas kinges alde.
     9686
and lætten swiðe hokerliche; of Lote þan eorle.
     9687
and duden swiðe vnwraste; alle his haste.
     9688
and weoren alle twi-ræde; heore teone wes þa mare.
     9689
Þis wes isæid sone; seocken þan kinge.
     9690
þat his hæȝe men; Lot al for-hoȝeden.
     9691
Nu ich þe wulle tellen; a þissen boc-spællen.
     9692
hv Vðer þe king; uu[nd]ede hine seolven.
     9693
He sæide þat he wolde; wende to his ferde.
     9694
and mid his eȝene iseon; wæ þer wolde wel don.
     9695
He lette makien þere; gode horse-bere.
     9696
& letten beoden uerde; ȝeond al his kine-ærde.
     9697
þat ælc mon bi his liue; comen to him swiðe.
     9698
bi heore liue & bi heore leme. to wræken þas kinges scome.
     9699
& ȝif þær is æi gume; þæt nulle hiȝenliche cume.
     9700