Layamon's Brut (British Museum Ms. Cotton Caligula A.IX)
Layamon

Lines 9401 through 9500

Ah longe is æuere; þat ne cum%með nauere.
     9401
þat he heo biwinne; bute þurh mine ginne.
     9402
for nis na wimmon treowere; in þissere worlde-riche.
     9403
& neoðe-les he scal aȝe; þa hende Ygærne;
     9404
on ((hir)) he scal streonen; þat scal wide sturien.
     9405
he scal streonien hire on; ænne swiðe sellichne mon.
     9406
Longe beoð æuere; dæd ne bið he næuere.
     9407
þe wile þe þis world stænt; ilæsten scal is worð-munt.
     9408
and scal inne Rome; walden þa þæines.
     9409
Al him scal abuȝe; þat wuneð inne Bruttene.
     9410
of him scullen gleomen; godliche singen.
     9411
of his breosten scullen æten; aðele scopes.
     9412
scullen of his blode; beornes beon drunke.
     9413
of his eȝene scullen fleon; furene gleden.
     9414
ælc finger an his hond; scarp stelene brond.
     9415
scullen stan walles; biuoren him to-fallen.
     9416
beornes scullen rusien; reosen heore mærken.
     9417
Þus he scal wel longe; liðen ȝeond londen.
     9418
leoden biwinnen; & his laȝen sette;
     9419
Þis beoð þa ((ta))cnen of þan sune. þe cumeð of U[ðe]re Pendragune.
     9420
and of Ygærne; Þes speche is ful derne.
     9421
for ȝet næt hit neoðer. Ygærne no Uðer.
     9422
þat of Vðere Pendragune; scal arisen swilc a sune.
     9423
for ȝet he beoð unstreoned; þa sturieð al þa þeoden.
     9424
Ah Lauerd quað Merlin; nu hit is iwille þin.
     9425
þat forð I scal fusen. to uerde þas kinges;
     9426
þi word ich wulle heren. and nu ich wulle wende;
     9427
and faren ich wulle for þire lufe; to Vthere Pendragune.
     9428
and habben þu scalt þat lond; þat he þe sette an hond.
     9429
Þus heo þa ispecken; þæ æremite gon to weopen.
     9430
deorliche he hine custe; þer heo gunnen dælen.
     9431
Merlin ferde riht suð; þat lond him wæs ful cuð.
     9432
forð-riht he fusde; to þes kinges ferde.
     9433
Sone swa Vðer hine isæh; swa he him to-ȝeines bæh.
     9434
& þus quað V[ð]er Pendragune; Mærlin þu ært wilcume.
     9435
Her ich sette þe an honde; al þene ræd of mine londe.
     9436
and þat þu me ræde; to muchere neode.
     9437
Vther him talde; al þat he walde. Page  492
     9438
& hu Ygærne him wes on leoden; wimmo[n]nen leofest.
     9439
and Gorlois hire lauerd; mo[n]nenen alre laðest.
     9440
& buten ich habbe þinne ræd; ful raðe þu isihst me dæad.
     9441
Þa andswerede Merlin; Let nu cume in Vlfin.
     9442
& bitæc him an honde; þritti sulȝene lond.
     9443
& bi-tæc þan æremite; þat þu him bihete.
     9444
for nulle ich aȝæn na lond; neouðer [seoluer na gold].
     9445
for ich am on rade. rihchest alre monnen.
     9446
& ȝif ich wilne æhte; þenne wursede ich on crafte.
     9447
Ah al þin iwille; wel scal iwurðen.
     9448
for ich con swulcne leche-craft; þe leof þe scal iwurðen.
     9449
þat al scullen þine [ch]eres; iwurðen swulc þas eorles.
     9450
þi speche þi dede; i-mong þere duȝeðe.
     9451
þine hors & þine iwe[d]e; & al swa þu scalt ride.
     9452
þenne Ygæ[r]ne þe scal iseon; a mode hire scal wel beon.
     9453
heo lið inne Tintaieol; uaste bituned.
     9454
Nis nan cniht swa wel iboren; of nane londe icoren.
     9455
þe mi[d] strengðe of Tintaieol; þe ȝeten mihten un-tunen.
     9456
buten he weoren ibirsted; mid hungere & mid þurste.
     9457
Þat is þat soðe; þat ich þe sugge wulle.
     9458
þurh alle þinge þu scalt beon; swulc þu eorl weore.
     9459
& ich wulle beon iwil del; swulc him is Brutael.
     9460
þat is a cniht swiðe herd; he is þeos eorles stiward.
     9461
Iurdan is his bur-cniht; he is swiðe wel idiht.
     9462
Ich wulle makien anan; Ulfin swulc is Iurdan.
     9463
Þenne bist þu lauer[d]; & ich Brutael þi stiward.
     9464
& Ulfin Iurdan þi bur-cniht; & we scullen faren nu to-niht.
     9465
faren þu scalt bi ræde; wuder-swa ich þe læde.
     9466
Scullen nu to-nihte; half hundred cnihten.
     9467
mid speren and mid scelden; beon abuten þine telden;
     9468
þat nauere nan qui[k] mon; ne cumen þer aneosten.
     9469
& ȝif þer auer-æi mon cume; þat his hæued him beon bi-numen.
     9470
for þa cnihtes scullen suggen; selen þine beornen.
     9471
þat þu ært ilete blod. and restest þe on bædde.
     9472
Þas þing%ges forð-rihte; þus weoren idihte.
     9473
Forð ferde þe king; næs hit cuð na-þing. Page  494
     9474
and ferden forð mid him; Vlfin & Merlin.
     9475
he tuȝen riht þen wæi; þa in-to Tintaieol læi.
     9476
heo comen to þas castles ȝæte; & cuð-liche cleopeden.
     9477
Vndo þis ȝæt-essel; þe eorl is icumen here.
     9478
Gorlois þe læuerd; & Britael his stiward.
     9479
and Iurdan þe burcniht; we habbeoð ifaren al niht.
     9480
Þe ȝæte-ward hit cudde ouer-al; & cnihtes urnen uppen wal.
     9481
and speken wið Gorlois; and hine icneowen mid iwis.
     9482
Þa cnihtes weoren swi[ð]e whæte; and wefden up þa castles ȝæte.
     9483
& letten hine binnen fare; þa læsse wes þa heore care.
     9484
heo wenden mid iwisse; to habben muchel blisse.
     9485
Þa hædden heo mid ginne; Merlin þer wið-inne.
     9486
& heo[lden] Vðer þene king; wið-inne heore walding.
     9487
and ledde þer mid him; his gode þein Ulfin.
     9488
Þis tidinde com biliue; in to þan wife.
     9489
þæt hire læuerd wes icumen; and mid him his þreo gumen.
     9490
Vt com Ygærne; forð to þan eorle.
     9491
and þas word seide; mid wunsume wurde.
     9492
Wil-cume læuerd; monne me leofest.
     9493
& wilcume Iurdan; and Britael is a[l]swa.
     9494
Beo ȝe mid isunde; to-dæled from þan kinge.
     9495
Þa quæð Vðer ful iwis; swulc hit weore Gorlois.
     9496
Muchel þat mon-kun; þæt is mid Vther Pendragun.
     9497
and ich æm bi nihte; bi-stole from þan fihte.
     9498
for æfter þe ic wes of-longed; wifmonne þu ært me leofuest.
     9499
Buð in-to bure; & let mi bed makien.
     9500