Layamon's Brut (British Museum Ms. Cotton Caligula A.IX)
Layamon

Lines 9301 through 9400

Uppen þere sæ-stronde; Tintaieol stondeð.
     9301
he is mid sæ-cliuen; faste biclused.
     9302
þat ne bið he biwunne; þurh nanes cunnes monnen.
     9303
bute ȝif hunger; cumen þer an-vnder.
     9304
Þe eorl uerde þenne; mid seouen þusend monnen.
     9305
& wende to ane oðere castle; and bic[lu]sde hi[ne] ful uæste.
     9306
and bilefde his wif in Tintaieol; mid ten þusend monnen.
     9307
For ne þurue þa cnihtes; dæies na nihtes.
     9308
buten biwiten þat castelȝat; & careles liggen. slæpen.
     9309
and þe eorl wuste þene oðer; & mid him his a[ȝen] broðer.
     9310
Þis iherde Vther; þe king wes swiðe steorc.
     9311
þat Gorlois his eorl; his ferde hafde igadere[d].
     9312
and wolde halde weorre; mid muchelere wraððe.
     9313
Þe king bad his ferde; ȝeond al þissen ærde.
     9314
& ȝeond al þan londe. þa stoden an his honde.
     9315
monies kinnes leoden; liðen heom to-gæderes.
     9316
and comen to Lundene; to þan leod-kinge.
     9317
Ut of Lundene tun; ferde Vðer Pendragun.
     9318
he & his cnihtes. ferde uorð-rihtes.
     9319
swa longe þat heo comen; into Cornwæille.
     9320
& ouer þat water heo tueoȝen; þat hatten Tambreis.
     9321
riht to þan castle; þer heo Gorlois wusten. Page  486
     9322
Mid muchelere læðe; þene castel heo bilæien.
     9323
ofte heo to-ræsden; mid ræȝere strengðe.
     9324
to-somne heo leopen; leoden þer feollen.
     9325
Fulle seouen nihte; þe king mid his cnihten;
     9326
bilæi þene castel; his men þer hafeden sorȝen.
     9327
ne miste he of þan eorle; naþing iwinnen.
     9328
and alle þa seouen nihte; ilaste þat selliche feoht.
     9329
Þa iseh Vðer king; þat him ne spedde naðing.
     9330
ofte he hine biþohte; whæt he don mahte.
     9331
for Ygærne him wes swa leof; æfne alse his aȝen lif.
     9332
and Gorlois him wes on leoden; monnen alre læðest.
     9333
& ælches weies him wes wa. a þissere weorlde-riche.
     9334
for he ne mihte beon wurðe; na-þing of his wille.
     9335
Þa wes mid þan kinge; an ald mon swuðe hende.
     9336
he wes a swiðe riche þein; and ræh on ælche dome.
     9337
he wes ihaten Vlfin; muche wisdom wes mid him.
     9338
Þe king bræid up his chin; and bisah an Vlfin.
     9339
swiðe he murnede; his mod wes iderued.
     9340
Þa quað Vðer Pendragun; to Ulfin þan cnihte.
     9341
Ulfin ræd me sumne ræd; oðer ich beo ful raðe dæde.
     9342
swa swiðe me longeð; þat ne mai i noht libben.
     9343
after þere faire Ygærne; Þis word halt me derne.
     9344
for Ulfin þe leoue; aðele þine lare.
     9345
lude & stille; don ich heom wulle.
     9346
Þa andswarede Ulfin; þan kinge þet spac wið him.
     9347
Nu ihere ich muche seollic; ænne king suggen.
     9348
Þu luuest Ygærne; and halst hit swa deorne
     9349
þe wifmon is þe to leof; & hire lauerd al to lað.
     9350
his lond þu forbernest; & hine blæð wurchest.
     9351
and þrattest hine to slænne; & his cun to for-donne.
     9352
Wenest þu mid swulche hærme; to biȝeten Ygærne.
     9353
þenne heo sculde don; swa ne deð na wif-man.
     9354
mid æie vnimete; halden luue swete.
     9355
Ah ȝif þu luuest Ygærne; þu sculdest hit halden derne.
     9356
and senden hire sone; of seoluere and of golde.
     9357
& luuien hire mid liste; & mid leofliche bihæste.
     9358
Þa ȝet hit weore a wene; whar þu heo mihtes aȝe.
     9359
for Ygærne is wel idon; a swiðe treowe wimmon.
     9360
swa wes hire moder; & ma of þan kunne.
     9361
To soðe ich þe suggen; leofest alre kinge. Page  488
     9362
þat oðere weies þu most ag[i]nnen; ȝif þu hire wult awinnen.
     9363
For ȝursten-dæi me com to; an æremite wel idon.
     9364
& swor bi his chinne; þat he wuste Merlin.
     9365
whar he ælche nihte; resteð vnder lufte.
     9366
and ofte he him spæc wið; & spelles him talde.
     9367
& ȝif we mihte Merlin; mid liste biwinnen.
     9368
þenne mihtest þu þine iwille; allunge biwinne.
     9369
Þa wes Vðer Pendragun; þa softer an his mode.
     9370
& ȝ[a]f and-sware red; Vlfin þu hauest wel isæd.
     9371
Ich þe ȝiue an honde; þritti solh of londe.
     9372
þat þu Merlin biwinne; & don mine iwille.
     9373
Vlfin ȝeond þat folc wende; & sohte al þa uerde.
     9374
& he vmbe stunde; þene æremite f[u]nde.
     9375
and an hiȝinge; brohte hine to þan kinge.
     9376
and þe king him sette an hond; seouen sulȝene lond.
     9377
ȝif he mihte bringen; Merlin to þan kinge.
     9378
Þe æremite gon wende; in þene west ænde.
     9379
to ane wilderne; to ane wude muchele.
     9380
þer he iwune[d] hafde. wel feole wintre.
     9381
and Merlin swiðe ofte; þer-inne sohte.
     9382
Sone þe armite com in; þa ifunde he Mærlin.
     9383
vnder ane treo stonden; and sære him gon longen.
     9384
þene æremite he isæh cume; alse while wes his iwune.
     9385
he orn him to-ȝænes; beiene heo uæineden þas.
     9386
heo clupten heo custen; and cuð-liche speken.
     9387
Þa sæide Merlin; muchel wisdom wes mid him.
     9388
Sæie þu mi leofe freond; wi naldest þu me suggen.
     9389
þurh nanes cunnes þinge; þat þu wældest to þan kinge.
     9390
Ah ful ȝare ich hit wuste; anan swa ich þe miste.
     9391
þat þu icumen weore; to Vðere kinge.
     9392
and what þe king þe wið spæc; and of his londe þe bæd.
     9393
þat þu me sculdest bringe; to Vðer kinge.
     9394
And Vlfin þe sohte; & to þan kinge brohte.
     9395
& Vðer Pendragun. forð-rihtes anan.
     9396
sette him an honde. þritti solh of londe.
     9397
& he sætte þe an honde; seoue sulhȝene lond.
     9398
Vther i[s] of-longed; æfter Ygærne þere hende.
     9399
wunder ane swiðe; after Gorloises wiue. Page  490
     9400