Layamon's Brut (British Museum Ms. Cotton Caligula A.IX)
Layamon

Lines 9201 through 9300

bi-hehten god to donne; and þat ufel to for-gonne.
     9201
To þere mid-nihte; wepnede heom cnihtes.
     9202
and auoremeste uerde adun; Vðer Pendragun.
     9203
and his cnihtes alle; swiðe-liche stille.
     9204
and smiten i þa waldes; i-mong alle þa teldes.
     9205
and sloȝen þa hæðene; mid hæhȝere strenðe.
     9206
fluȝen ȝeond þan feldes; falewe lockes.
     9207
Uolken hit wes ærmest; heo droȝen heore þermes. Page  480
     9208
mid muchele vnisunde; heo feollen to þan grunde.
     9209
Þer wes forð-riht inume; Octa Hengestes sune.
     9210
& his wed-broðer; Ebissa; & his iuere Ossa.
     9211
Þe king heom lette binden; mid irene bænde.
     9212
and bi-tahte heom sixti cnihten; þe gode weoren to fihten.
     9213
ufen%nen þan walden; uaste to halden.
     9214
& he seolf draf him forð; and muchel dune makede.
     9215
& Gorlois þe hende; uorð an oðer ende.
     9216
& alle heore cnihtes; æuere forð-rihtes.
     9217
adun-rihtes sloȝen; al þat heo neh comen.
     9218
Summe heo crupen to þan wude; an heore bare cneowen.
     9219
heo weoren amærȝe; volken alre ærmest.
     9220
Octa wes ibunden; & ilad to Lunden.
     9221
and Ebissa & Ossa; nes heom nauere al swa wa.
     9222
Þis feh[t] wes idon; & þe king wende forð.
     9223
in-to Norð-humbre; mid hæȝere blisse.
     9224
& seoð[ð]en to Scot-londe; & sette hit al his aȝere hond.
     9225
He sette grið he sette frið; þat ælc mon mihte faren wið.
     9226
from londe to londe; þeh he bere gold an honde.
     9227
of grið he dude swulc þing; þat ne mihte næuer ær na king.
     9228
from þan ilke time; þat Bruttes comen her liðen.
     9229
And seoððen vmbe stunde; he ferde to Lunden.
     9230
he wes þere an Æstre; mid aðele his uolke.
     9231
bliðe wes þe Lundenes tun; for Vthere Pendragun.
     9232
He sende his sonde; ȝeond al his kinelonde.
     9233
he bæd þa eorles; he bæd þa cheorles.
     9234
he bæd þa biscopes; þa boc-ilærede men.
     9235
þat heo comen to Lunden; to Vðer þan kingen.
     9236
in-to Lundenes tun; to Vðer Pendragun.
     9237
Riche men sone; to Lundene comen.
     9238
heo brohten wif heo brohten child; swa hehte Vther þe king.
     9239
Mid muchele godnæsse; þe king iherde mæsse. Page  482
     9240
& Gorlois þe eorl of Cornwale; & mid him cnihtes uale.
     9241
muche blisse wes i þan tun; mid Vðer kinge Pendragun.
     9242
Þa þe mæsse wes isungen; to halle heo þrungen.
     9243
bemen heo bleowen; bordes heo brædden.
     9244
al þat folc æt & dronc. & blisse heom wes imong.
     9245
Þer sæt Vðer þe king; an his hæh setle.
     9246
forn aȝan him Gorlois; hende cniht ful iwis.
     9247
þe eorl of Cornwale; mid aðele his wife.
     9248
Þa heo weoren alle iseten; eorles to heore mete.
     9249
þe king sende his sonde; to Igærne þere hende.
     9250
Gorlois eorles wif; wifmone alre hendest.
     9251
Ofte he hire lokede on; & leitede mid eȝene.
     9252
ofte he his birles sende; fron to hire borde.
     9253
ofte he hire loh to; & makede hire letes.
     9254
and [heo] hine leofliche biheold; ah inæt whær heo hine luuede.
     9255
Næs þe king noht swa wis; ne swa ȝære-witele.
     9256
þat imong his duȝeþe; his þoht cuðe dernen.
     9257
Swa longe þe king þis him droh; þat Gorlois iwærð him wrað.
     9258
& him gromede swiðe; wið þene king for his wife.
     9259
Þe eorl & his cnihtes; arisen forð-rihtes.
     9260
& forð mid þan wife; cnihtes swiðe whraðe.
     9261
Vther king þis isah; & here-fore særi wes.
     9262
& nom him forð-rihtes; twælf wise cnihtes.
     9263
& sende after Gorlois; gumenene ældere.
     9264
and beden hine an hiȝinge; cumen to þan kinge.
     9265
& don þan kinge god riht; & beon icnowen of his pliht.
     9266
þat he ha[f]de þene king iscend; & from his borde wes iwende.
     9267
he and his cnihtes; mid muchele vn-rihte.
     9268
for þe king him wæs glad wið; & for he hailede in his wif.
     9269
& ȝif he nalde aȝein cumen; & his gult beon icnawen;
     9270
þe king him wold after; and don al his mahten.
     9271
binimen him al his lond; and his seoluer & his gold.
     9272
Þis iherde Gorlois; gumenene lauer[d].
     9273
& he and-sware ȝaf; eorlene wraðest.
     9274
Næi swa me helpe Drihte; þa iscop þas daȝes lihte.
     9275
nulle ich nauere aȝæn cumen; no his grið ȝirnen.
     9276
ne scal he neuere on liue. me scende of mine wife.
     9277
& suggeð Vðer kinge; at Tintaieol he mai me finden.
     9278
ȝif he þ[i]der wule ride; þer ich him wulle abiden.
     9279
and þer he scal habbe hærd gome. & mucle weorldes scome.
     9280
Forð wende þe eorl; ire on his mode.
     9281
he wes wærð wið þene king; wunder ane swiðe.
     9282
and þretede Vther þene king; and alle his þeines. mid him.
     9283
ah he nuste whæt com seoððe; sone þer-æfter.
     9284
Þe eorl anan wende; in-to Cornwaille. Page  484
     9285
he hafde þer tweie castles; biclused swiðe uaste.
     9286
þæ castles aðele weore; of his eoldrene istreon.
     9287
To Tintaieol he sende; his leofmon þa wes hende.
     9288
Ygerne ihaten; wifene aðelest.
     9289
and heo biclusde uæste; inne þan castle.
     9290
Ygerne wes særi; & sorh-ful an heorte.
     9291
þat swa moni mon for hire; sculden habben þer lure.
     9292
Þe eorl sende sonde; ȝeond al Brutlonde.
     9293
and bæd alcne ohte gome; þat he him sculde to cume.
     9294
for gold and for seolure; & for oðere ȝiuen gode.
     9295
þat heo ful sone; to Tintaieole comen.
     9296
& his aȝene cnihtes; comen forð-rihtes.
     9297
Þa heo to-gædere weoren; sele þeines.
     9298
þa hafde he fulle; fiftene þusend.
     9299
& heo Tintaieol; faste bitunden.
     9300