Layamon's Brut (British Museum Ms. Cotton Caligula A.IX)
Layamon

Lines 8001 through 8100

& heore fiht & heore uare; & heore uæi uolc.
     8001
Ah ȝif þu weore swa wis mon; & swa witter a þoncke.
     8002
þat þv fræinedest me; of feole þine sorȝen.
     8003
of þire mucle kare; þa þe is to cumene.
     8004
ich þe wolde suggen; of sorȝe þine.
     8005
Þa quað Vortiger þe king; Leofue freond Merling.
     8006
sæie me of þan þinge; þe me to cumen sonden.
     8007
Bluðeliche quad Mærlin; baldere stefne.
     8008
ich þe wulle suggen; ah æuere hit wule ((þe)) reouwen.
     8009
King king bi-siȝ þe; Sorȝen þe bið ȝeueðe;
     8010
of Costantines cunne; his bern þu aqualdest;
     8011
Þu lettest slæn Costanz. þe wes king a þis lond;
     8012
þu lettest þine Peohtes; hine ladliche biswiken.
     8013
þer-uore þu ibidest; alre baluwene mæst.
     8014
Seoððen þu tuȝen uuenon þe; uncuðe leoden.
     8015
Saxes to londe; þer-uore þu wurðest to sconde.
     8016
Nu beoð of Brutaine; beornes ariued.
     8017
hit his Aurilien & Vther; nu þu ært þær-of war.
     8018
Heo cumeð to-mærȝen fuliwis; i þis lond at Tottenæs.
     8019
ich do þe wel to witene; mid seouen hundred scipene.
     8020
& nu heo inne sæ; seilieð biliue. Page  418
     8021
Þu hauest heom muchel uuel idon; and nu þu most þat lað on-fon.
     8022
þu hauest a ba halue; bone þe þe þencheð.
     8023
þine ifan þe biuoren; & þine ifeond bæften.
     8024
Ah flih flih þinne wæi; & burh þine life.
     8025
& fleo þider þe þu fleo; heo þe wulleð after teon.
     8026
Ambrosie Aurilien; he hæue[ð] ærest þisne kinedo[m].
     8027
ah he þurh atterne drench; dæð scal iþolien.
     8028
& seoððen scal Vther Pendragon; habben þesne kinedom.
     8029
ah þi cun hine scal; mid attere aquellen.
     8030
ah ær he dæd þolie; he scæl dune makien.
     8031
Vther scal habben ænne sune; of Cornwaille he scal cumen.
     8032
þat beoð a wilde bar; iburst((l))ed mid stele.
     8033
Þe bar scal for-bærnen; hæhȝe þa burhȝes.
     8034
he scal alle þa swiken; swenien mid eiȝe.
     8035
he scal al þi riche cun; mid witen aquellen.
     8036
he bið swiðe oht mon; & aðele an þonke.
     8037
heonenæ into Rome; rixleð þeos ilke.
     8038
scal he alle his feond; fallen to grunde.
     8039
Soð ich habbe þe isæid; ah nis þe na þe softre.
     8040
ah flih mid þine verde; þine iuon þe cumeð to herede.
     8041
Þa aswac worden; Merlin þe wise.
     8042
& þe king lette blawen; þreottene bemen.
     8043
& forð mid his ferde; feo[n]dliche swiðe.
     8044
Nes þer uorð-rihtes; bute uirst of ane nihte.
     8045
þat comen þa broðere; beien to-some.
     8046
to sæ-stronde ful iwis; at Dertene-muðe i Totenas.
     8047
Þis iherden Bruttes; & weoren bliðe ful iwis.
     8048
Heo droȝen ut of þan wuden; & of þan wulderne.
     8049
bi sixti & bi sixti; & bi seouen hundred.
     8050
bi þrit[ti] & bi þritti; & bi feole þusend.
     8051
Þa heo comen to-somne; ful sel hit heo þuhte.
     8052
Þa broðeren to þissen ærde; brohten vnimete verde.
     8053
& her comen heom bi-uoren; balde þas Bruttes.
     8054
vnimete uolc; al hit wræ[h] þa wolde.
     8055
þæ ær weoren ȝeond wudes; wunderliche to-dreued.
     8056
þurh þene muchelne æie; and þurh þe muclen ærmðe.
     8057
& þurh þene mucle hærm; þa Hengest heom wrohte.
     8058
& hafde alle heore hæfd-((men)); mid cniuen amurðerd. Page  420
     8059
mid sæxen to-snæ[ðd]e; snelle þe þeines.
     8060
Bruttes heolden husting; mid heȝe wis-dome.
     8061
heo nomen Aurilien; þene ældre bro[ð]er a-nan.
     8062
inne hæȝe hustinge; and heouen hine to kinge.
     8063
Þa weoren Bruttes; mid blisse auulled.
     8064
bliðe an mode; þæ ær weoren murne.
     8065
Comen þas tiðende; to Vortigerne þan kinge.
     8066
þat Aurilien wes icoren; and to kinge iheouen.
     8067
Þa wes Vortiger wa; & æft him wes wurse.
     8068
Vortiger uerde; ver to ane castle.
     8069
Genoire hæhte; hæh an ane munte.
     8070
Cloard hæhte þe munt; and Hærgin hahte þat lond.
     8071
on-væst Wæie; þe is a water hende.
     8072
Vortigernes men nomen; al þat heo neh comen.
     8073
heo nomen wepnen & mete; a moni are wise.
     8074
to þan castle heo brohten; swa muchel swa heo rohten.
     8075
þat heo inoh hafden; þeh hit lutel hulpe.
     8076
Aurilien & Vther; weoren of Vortigerne war.
     8077
whær he wes uppen Cloward; biclused in castlen.
     8078
Heo letten blawen bemen; bonnien heore uerde.
     8079
volc unimete; of moni ane londe.
     8080
ferden to Genoire; þær læi Vortigerne.
     8081
King. wes wið-uten; king wes wið-innen.
     8082
cnihtes þer fuhten; mid feond-liche ræsen.
     8083
æuerælc god mon; gurede hine seolfuen.
     8084
Þa heo iseȝen; þat heo siȝen næfden.
     8085
þa to wude wenden; wunder muche uerde.
     8086
Heo uelden þæne wude adun; & droȝen to þan castle.
     8087
& fulden al þæ dic; þe wes wunder ane deop.
     8088
F[u]r heo in sende; on æuer-ælche ende.
     8089
& cleopeden to Vortiger; Nu þu scalt þe warmen þer.
     8090
for þu sloȝe Costanz; þe wes king of þis lond.
     8091
& seoððe Costantin his sune; Nu is Aurilie icumen.
     8092
& Vther his broðer; þa þe balu sendeð;
     8093
Þe wind wæht þat fur; þat hit wunderliche. born.
     8094
þe castel gon to bernen; bures þer s[w]ælden.
     8095
feollen þa hellen floȝen to grunde.
     8096
Ne mihten þer na cniht; aȝeines þe fure makien fiht.
     8097
þat fur eode ouer-al; & barnde hus & barnde wal. Page  422
     8098
& þe king Vortigerne; þer-inne he gon to berne.
     8099
al hit for-swælde; þat þer-inne wunede.
     8100