Layamon's Brut (British Museum Ms. Cotton Caligula A.IX)
Layamon

Lines 7701 through 7800

a þat ich mihte bæt; burhȝen iwinnen.
     7701
wræken me a mine feonden; þa mine wines feolden.
     7702
& habbeð al mi kine-lond; awræht ut of mire hond.
     7703
& þus me iflæmed; mine fulle ifan.
     7704
Þa andswerede a wis mon; þe wel cuðe ræden.
     7705
Lust me nu lauerd king; ich þe cuðe god þing.
     7706
uppen þan munte of Reir; ich wullen ræden.
     7707
þat þu caste[l] wurche; mid stronge stan walle.
     7708
for þer þu miht wunien; & libben mid winne. Page  400
     7709
& ȝet þu hauest a þire hond; muchel seoluer & gold.
     7710
to halden þine hired; þa þe helpen scal.
     7711
& swa þu miht on liue; libben alræ sælest;
     7712
Þa andswere[de] þe king; Let hit cuðen an hiȝing.
     7713
ȝeond muchele mire ferde; þæt ich faren wulle.
     7714
to þan munte of Reir; & ræren þer castel.
     7715
Forð ferde þe king; & þa ferde mid him.
     7716
Þa heo þider comen; dic heo bigunnen sone.
     7717
Hornes þer bleouwen; machunnes heowen.
     7718
lim heo gunnen bærnen; ȝeond þat lond ærnen.
     7719
& al Wæst Walsce lond; setten a Uortigernes hond.
     7720
al heo hit nomen; þat heo neh comen.
     7721
Þa þe dic wes idoluen; & allunge ideoped.
     7722
þa bi-gunnen heo wal; a þere dic ouer-al.
     7723
& heo lim & stan; leiden to-somne.
     7724
of machunes þer wes wunder; fif and twenti hundred.
     7725
A dæi heo leiden þene wal; a niht he feol ouer-al.
     7726
a marwe heo hine arædden; a niht he gon to-reosen.
     7727
Fulle seouen nihte; swa heom dihte.
     7728
ælche dæi heo hine aredden; & ælche niht he gon reosen.
     7729
Þa wes sari þe king; & sorhful þurh alle þing.
     7730
swa wes al þa uerde ladliche of-færed.
     7731
for æuere heo lokede; whænne Hengest come an-uuenan.
     7732
Þe king wes ful særi; & sende after witien.
     7733
æfter world-wise monne; þa wisdom cuðen.
     7734
& bad heom leoten weorpen; & fondien leod-runen.
     7735
fondien þat soðe; mid heore siȝe-craften.
     7736
whær-on hit weore ilong; þat þe wal þe wes swa strong.
     7737
ne moste niht-longes; nauere istonden.
     7738
Þas weorlde-wise men; þer a twa wenden.
     7739
summe heo wenden to þan wude; summe to weien-læten.
     7740
heo gunnen loten weorpen; mid heore leod-runen.
     7741
fulle þreo nihten; heore craftes heo dihten.
     7742
Ne mihten heo nauere finden; þurh nauere nane þinge.
     7743
whær-on hit weore ilong; þat þe wal þat wes swa strong.
     7744
æuere-ælche nihte to-ras; & þe king his swinc læs.
     7745
Buten witie þer wes an; he wes ihaten Ioram.
     7746
he seide þat he hit afunde; ah hit þuhte læsinge.
     7747
he seide ȝif mon funde; in auer æi londe. Page  402
     7748
æuer æi cniht bærn; þe næuere fæder no ibæd.
     7749
& openede his breoste; & nomen of his blode.
     7750
& mengde wið þan l((i))me; & þæne wal læide.
     7751
þenne mihte he stonde; to þere worlde longe.
     7752
Þat word com to þan kinge; of þere læsinge.
     7753
& he hit i-lefde; þah hit læs weore.
     7754
Sone he nom his sonde; & sende ȝeond þan londe.
     7755
swa feor swa he for dæðes kare; dursten æies weies faren.
     7756
& in ælche tune; hercneden þa runen.
     7757
whær heo mihten ifinden. speken of swulche childe;
     7758
Þas cnihtes forð ferden; widen ȝeond þan ærde.
     7759
tweien uerden ænne wæi; þe west-riht him læi.
     7760
þe læi forð-rihtes in; þer nu is Kaer-merðin.
     7761
Bisides þere burh; in ane weie brade.
     7762
hefden ænne muchelne plæȝe; alle þa burh-cnauen.
     7763
Þas cnihtes weoren weri; & an heorte swiðe særi.
     7764
& seten adun bi þan plaȝe; & bi-heolden þas cnauen.
     7765
Vmben ane stunde; heo bigunnen striuinge.
     7766
al-se hit wes auer laȝe; imong childrene plæȝe.
     7767
þe an þe o[ð]erne smat; & he þeos dun[t]es abad.
     7768
Þa wes swiðe grim; Dinabuz touward Mærlin.
     7769
& þus quað Dinabus; þe þene dunt hefde.
     7770
Mærling vnwærste man; whu hæuest þu me þus idon.
     7771
þu hauest idon me muchel scome; þer-fore þu scalt habben grome.
     7772
Ich æm anes kinges sune; & þu ært of noht icumen.
     7773
Þv nahtes i nane stude; habben freo monnes ibude.
     7774
for swa wes al þa uore; þi moder wes an hore.
     7775
for nuste heo næuere þene mon; þat þe streonde hire on.
     7776
no þu on moncunne; nefdest fader nenne.
     7777
& þu in ure londe; makest us to sconde.
     7778
þu ært us imong icumen; & nært nænes ((monnes)) sune.
     7779
þu scalt i þissen dæie; þer-uore dæd þolien.
     7780
þis iherden þa cnihtes; þer heo weoren bi-halues.
     7781
heo arisen up & eoden neor; & neodeliche ȝerden.
     7782
of þissere uncuðe talen; þe heo iherden of þan cnauen.
     7783
Þa wes inne Kair-merðin; a reue þe hehte Eli.
     7784
þa cnihtes biliue; comen to þan reue.
     7785
& þus him to sæiden; sone mid muðe.
     7786
We buð her-rihtes; Uortigernes cnihtes. Page  404
     7787
& habbeoð her ifunde; enne cnaue ȝunge.
     7788
he is ihaten Merlin; ne icnawe we na-wiðt his cunne.
     7789
Nim hine [an] hiȝin[g]e; & sende hine to þan kinge.
     7790
al-se þu wult libben; & þine limen habben.
     7791
& his moder mid him; þe hine bar to monnen.
     7792
ȝif þu þis wult don; þe king heom wule under-fon.
     7793
& ȝif þu hit noht ne ȝemest; þer-fore þu bist flæme.
     7794
& þas burh al for-bard; þas leoden al fordemed.
     7795
Þa answarede Eli; þe reue of Kæir-merðin.
     7796
Wel ic wat þat al þis lond; stunt a Vortigernes hond.
     7797
& we beoð alle his men; his monscipe is þe mare.
     7798
& we scullen þis don fain; & driȝen his wille.
     7799
Forð wende þe reue; & burh-men his iuere.
     7800