Layamon's Brut (British Museum Ms. Cotton Caligula A.IX)
Layamon

Lines 6901 through 7000

An alle mine iliue; þe ich iluued habbe.
     6901
bi dæie no bi nihtes; ne sæh ich nauere ær swulche cnihtes.
     6902
for eouwer cumen ich æm bliðe; & mid me ȝe scullen bilæfuen.
     6903
& eouwer wille ich wulle driȝen; bi mine quicke liuen.
     6904
Ah of eou ich wulle iwiten; þurh soðen eouwer wurð-scipen.
     6905
whæt cnihten ȝe seon; & whænnenen ȝe icumen beon.
     6906
& whar ȝe wullen beon treowe; alde & æc neowe.
     6907
Þa answerede þe oðer; þat wes þe aldeste broðer.
     6908
Lust me nu lauerd king; & ich þe wullen cuðen.
     6909
what cnihtes we beoð; & whanene we icumen seoð.
     6910
Ich hatte Henges; Hors is mi broðer.
     6911
we beoð of Alemainne; aðelest alre londe.
     6912
of þat ilken ænde; þe Angles is ihaten.
     6913
Beoð in ure londe; selcuðe tiðende.
     6914
vmbe fiftene ȝer; þat folc his isomned.
     6915
al ure iledene folc; & heore loten werpeð.
     6916
vppen þan þe hit fale[ð]; he scal uaren of londe.
     6917
bilæuen scullen þa fiue; þa sexte scal forð liðe.
     6918
ut of þan leode; to u[n]cuðe londe.
     6919
ne beo he na swa leof mon; uorð he scal liðen.
     6920
For þer is folc swiðe muchel; mære þene heo walden.
     6921
Þa wif fareð mid childe; swa þe deor wilde.
     6922
æueralche ȝere; heo bereð child þere;
     6923
Þat beoð an us feole; þat we færen scolden.
     6924
ne mihte we bilæue; for liue ne for dæðe.
     6925
ne for nauer nane þinge; for þan folc-kinge.
     6926
Þus we uerden þere; & for þi beoð nu here. Page  360
     6927
to sechen vnder lu[f]te; lond & godne lauerd.
     6928
Nu þu hæfuest iherd lauerd ki[n]g; soð of us þurh alle þi[n]g.
     6929
Þa answærede Vortiger; of alc an vfele he wes war.
     6930
Ich ileue þe cniht; þat þu me sugge soð-riht.
     6931
& wulche beoð æoure i-leuen; þat ȝe on ileueð.
     6932
& eoure leofue godd; þe ȝe to lute[ð].
     6933
Þa andswarede Hænges; cnihtene alre fæirest.
     6934
nis in al þis kine-lond; cniht swa muchel ne swa strong.
     6935
We habbeð godes gode; þe we luuieð an ure mode.
     6936
þa we habbeð hope to; & heoreð heom mid mihte.
     6937
Þe an hæhte Phebus; þe oðer Saturnus.
     6938
þe þridde hæhte Woden; þat is an weoli godd.
     6939
þe feorðe hæh[te] Iupiter; of alle þinge he is whar.
     6940
þe fifte hæhte Mercurius; þat [i]s þe hæhste ouer us.
     6941
þæ sæxte hæhte Appollin; þat is a godd wel idon.
     6942
þe seoueðe hatte Teruagant; an hæh godd in ure lon[d].
     6943
Ȝet we habbeð anne læuedi; þe hæh is & mæhti.
     6944
heh heo is & hali; hired-men heo luuieð for þi.
     6945
heo is ihate Frææ; wel heo heom dihteð.
     6946
Ah for alle ure goden deore; þa we scullen hæren.
     6947
Woden hehde þa hæhste laȝe; an ure ælderne dæȝen.
     6948
he heom wes leof; æfne al-swa heore lif.
     6949
he wes heore walden; and heom wurð-scipe duden.
     6950
þene feorðe dæi i þere wike; heo ȝifuen him to wurð-scipe.
     6951
Þa þunre heo ȝiuen Þunres-dæi; for þi þat heo heom helpen mæi.
     6952
Freon heore læfdi; heo ȝiuen hire Fridæi.
     6953
Saturnus heo ȝiuen Sætterdæi; þene sunne heo ȝiuen Sonedæi.
     6954
Monen heo ȝifuen Monedæi; Tidea heo ȝeuen Tis-dæi.
     6955
Þus seide Hæ[n]gest; cnihten alre hendest.
     6956
Þa answerede Vortiger; of ælchen vfel he wæs wær.
     6957
Cnihtes ȝe beoð me leofue; ah þas tiðende me beoð laðe.
     6958
eouwer ((ileuen)) beoð vnwraste; ȝe ne ileoueð noht an Criste.
     6959
ah ȝe ileoueð a þene Wurse; þe Godd seolf awariede.
     6960
eoure godes ne beoð nohtes; in helle heo niðer liggeð.
     6961
Ah neoðeles ich wulle eou at-hælde. an mine anwalde.
     6962
for norð beoð þa Peohtes; swiðe ohte cnihtes.
     6963
þe ofte ledeð in mine londe; ferde swiðe stronge. Page  362
     6964
& ofte do[ð] me muchele scome; & þerfore ich habbe grome.
     6965
& ȝif ȝe me wulleð wræken; & heore hæfden me biȝeten.
     6966
ich eou wullen ȝeuen lond; muchel seoluer & gold.
     6967
Þa andswerede Hængest; cnihtene alre feirest.
     6968
Ȝif hit wulle Saturnus; al hit scal i-wurðe þus.
     6969
& Woden ure lauerd; þe we on bi-liueð.
     6970
Hengest nom læue; & to scipen gon liðe.
     6971
þer wes moni cniht strong; heo droȝen heore scipen uppe þe lond.
     6972
Forð wenden dringches; to Vortigerne þan kenge.
     6973
biuoren wende Hengest; & Hors him alre hændest.
     6974
seoððen þa Alemainisce men; þa aðele weoren an deden.
     6975
& seoððen heo senden him to; heore Sæxisce cnihtes wel idon.
     6976
Hengestes cunnes-men; of his aldene cu[ð]ðen.
     6977
Heo comen in-to halle; hændeliche alle.
     6978
bett weoren iscrudde; & bed weoren iuædde.
     6979
Hængest swaine; þene Vortigernes. þeines;
     6980
Þa wes Vortigernes hired; for hehne ihalden.
     6981
Bruttes weoren særi; for swulchere isihðe.
     6982
Nes hit nawiht longe; þat ne comen to þan kinge.
     6983
cnihtes sunen uiue; þa i-faren hafden biliue.
     6984
heo sæiden to þan kinge; neowe tiðenden.
     6985
Nu forð-rihtes; icumen þa Peohtes.
     6986
þurh þi lond heo ærneð; & hærȝieð & berneð.
     6987
& al þene norð ænde; iuæld to þan grunde.
     6988
her-of þu most ræden; oðer alle we beoð dæden.
     6989
Þe king hine bi-þohte; whæt he don mihte.
     6990
he sende to þan innen; after al his monnen.
     6991
Þer com Hengest þer com Hors; þer com m[o]ni mon ful oht.
     6992
þer comen þa Saxisce men; Hengestes cunnes-men.
     6993
& þa Alemainisce cnihtes; þe beoð gode to fihte.
     6994
Þis isæh þe king Vortiger; bliðe wes he þa þer.
     6995
Þa Peohtes duden heore iwune; a þas hælf þere Humbre, heo weoren icume.
     6996
& þe king Vortiger; of heore cume wes ful war.
     6997
to-gadere heo comen; & feole þer of-sloȝen.
     6998
þer wes feht swi[ð]e strong; comp swiðe sturne.
     6999
Þe Peohtes weoren ofte iwuned; Vortigene to ouer-cumen.
     7000