Layamon's Brut (British Museum Ms. Cotton Caligula A.IX)
Layamon

Lines 6701 through 6800

fulle twa ȝere. mid þan kinge heo wuneden þere.
     6701
& Uortiger þe stiward; wes heore alre lauerd.
     6702
A he seide þat Bruttes; neoren noht to nuttes.
     6703
ah he seide þat þa Peohtes; weoren gode cnihtes.
     6704
A weoren Bruttes godes bidaled;
     6705
& þa Peohtes walden. al þat heo wolden;
     6706
heo hafden drænc heo hafden mete. heo hafden muchel blisse æke;
     6707
Vortiger heom salde. al þat heo wolden;
     6708
& heom wes al swa leof. swa heore aȝene lif;
     6709
swa þat heo al speken. þer heo heore mete æten;
     6710
þat Uortiger weoren wurðe. to walden þas þeode;
     6711
þurh-ut alle þinges. bæt þene swulche þreo kinges.
     6712
Vortiger ȝef þissen gumen; swiðe muchele gærsume.
     6713
Þa ilomp hit on ane dæie; þa Uortiger at his inne laie.
     6714
he nom his tweiene cnihtes; & sende æfter þan Peohtes.
     6715
hæhten heom cumen for; for alle heo sculden æten þer.
     6716
To him comen þa cnihtes; to his inne forð-rihtes.
     6717
he uondede heom mid worde; alse heo seten at borde.
     6718
he lette heom bringen schenches; of feole cunne drenches.
     6719
heo drunken heo dremden; dæi þer forð eode.
     6720
Þa heo weore swa drunken; þat wakeden heore sconken;
     6721
þa spæc Uortiger; þat he hæfde iþoht ær.
     6722
Hercneð nu me cnihtes; ich wulle suggen eow uorð-rihtes;
     6723
of mire muchele sorȝen. þat ich fore habbe imurned;
     6724
Þe king me bi-tahte þis ard for to beon his stiward;
     6725
Ȝe beoð me on liue. alre monnen leof[es]t.
     6726
ah nabbe ich æhten; to ȝiue mine cnihten.
     6727
for þes king æh al þis lond; and he is ȝung & þæh strong.
     6728
and al ic him mot ȝelden; þat ich nime of his londe.
     6729
& ȝif ich his for-leose; ich sal laȝe þolien.
     6730
& mine ahten ich habbe ispend; for ich eo wulle iquemen.
     6731
& nu ich mot heonene uaren; feor to summe kinge.
     6732
heren him mid sæhte; & bi-winnen mid him ahte.
     6733
ne mæi I noht for muchele scome. habben here þesne wone; Page  350
     6734
ah forð ich mot liðen. to uncuðe leoden;
     6735
& ȝif auere cumeð þe dæi; þat ich æhten bi-ȝiten mæi.
     6736
and ich maȝen swa wel iþeon; þat ȝe cumen a londe þer ich beon.
     6737
ich eow wulle wel biwiten; mid muchelere wurðscipe.
     6738
And habbeoð alle godne dæi; to-niht ich wulle faren awæi.
     6739
hit bið a muchele wæne; whær ȝe i-seon me auere-mare.
     6740
Nusten noht þas cnihtes. wæt þe swike þohte.
     6741
Vortiger wes fæc; for her he his lauerd bi-swæc;
     6742
& þe cnihtes heolden hit for soh. þat þe swike sæide;
     6743
Fortiger hæhte his sweines. sadeli his blonken;
     6744
& nemnede twælf scalkes. to laden mid him-seoluen;
     6745
to horsen heo eoden. swulc heo wolden of þeoden;
     6746
Þat iseoȝen þa Peohtes. þa for-drunkene cnihtes;
     6747
hu Vortiger wolde uaren. her-uore heo hæfden muchelne kare;
     6748
heo eoden to ræden. heo eoden to rune;
     6749
alle heo menden heore lif. for Vortiger heom wes swa leof;
     6750
& þus seiden þa Peohtes. þa drunkene cnihtes;
     6751
Whæt maȝe we nu to rade. Whæ scal us nu ræden;
     6752
Wha scal us feden Wha scal us scruden;
     6753
Wha scal an hirede beon ure lauerd;
     6754
Nu Vortiger is iuaren. alle we mote fusen;
     6755
Nulle we for nane þinge. munec habbe to kinge;
     6756
Ah wulle we wel don. forð-riht faren we him to;
     6757
diȝelliche & stille. & don al ure iwille;
     6758
in-to his bure. & drincken of his beore;
     6759
Þenne we habbeð idrunken. dreme we lude;
     6760
& summe sculleð to þere dure; mid sweorden sto[n]den þer biuoren.
     6761
& summe forð-rihtes; nimen þene king & his cnihtes.
     6762
& slæn of þa hafden; & we seolf hired haben.
     6763
& leten sone of-ærnen; uræ lauerd Uortigerne.
     6764
& seoððen þurh alle þinge; hæbben hine to kinge.
     6765
þenne mah we libben; swa us bið alre leofuest.
     6766
Wenden þa cnihtes; to þan kinge forð-rihtes.
     6767
eoden heo alle; þurh-ut þære halle.
     6768
in-to þas kinges bure; þer he sæt bi fure.
     6769
Nes þer nan þat word spæc; bute Gille Callæt.
     6770
þus he wið þæne kinge spæc; swiken he þohte þet.
     6771
Lust me nu leod-kinge; Nulle ich þe liȝen naðing. Page  352
     6772
We habbeoð i-beon an hirede; hæhliche iwurðed.
     6773
þurh þinne stiwærd; þe haueð iwiten al þis ærd.
     6774
he us haueð wel iued; he us haueð wel iscrud.
     6775
& to soðe ich sugge þe mai; mid him we æten nu to-dæi.
     6776
ah sare us of-þuncheð; nefden we noht to drinken.
     6777
& nu we beoð in þine bure; ȝef us drinken of þine beore.
     6778
Þa ȝæf þe king answare; þat scal beon eowre laste kare.
     6779
for ȝe sculleð habben to drinken; þa while þe eow god þunche.
     6780
Me heom brohte drinken; & heo gunnen dremen.
     6781
Þus sæide Gille Calæt; to þere dure he wes ful wæt.
     6782
Whær beo ȝe cnihtes; Sturieð eow forð-rihtes.
     6783
& heo þene king igripen; & his hæfde of smiten.
     6784
& alle his cnihtes; heo sloȝen forð-rihtes.
     6785
& nomen ænne sondes-mon; and senden toward Lunden.
     6786
þat he swiðe sculde ærne; æfter Uortigerne.
     6787
þat he swiðe comen; & þene kine-dom nome.
     6788
for þat wuste he þurh alle þing; islæȝen wes Costanz þe king.
     6789
Þet iharde Uortigerne; þe swike wes ful derne.
     6790
þus he hæhte þene sondes-mon; aȝan for[ð]-riht anan.
     6791
& hat heom wel bi-witen; al ure wurð-scipen.
     6792
þat nauer anne wende; ut of þan ænde.
     6793
ah alle me abiden; a þat ich cu[m]e riden.
     6794
& swa ich wulle dele; þis lond us alle imæne.
     6795
Forð wende þe sondes-mon; and Vortiger nom anan.
     6796
& sende ȝeond Lunden; & to hustinge hehte heom.
     6797
ræðen & ful sone; þat heo alle comen.
     6798
Icumen weoren þa burmen; þe swiðe balde weoren.
     6799
þa spæc Vortigerne; þe swike wes ful deorne.
     6800