Lines 5001 through 5100
nes hit neuere itiled; þurh nænne eorðe-itilie.
5001
no nauere þer ne wuneden on; nanes cunnes quic mon.
5002
Sonen heo gunnen to ærien; þat lond wes swiðe æðele.
5003
heo tileden heo seowen; heo repen heo meowen.
5004
wið-innen þan þrom ȝeren; þa nomen heo twælf iueren.
5005
& heo uerden sone; þat heo to þisse londe comen.
5006
Bruttes heo gretten; mid græi[ð]lichen worden.
5007
beden heom beon on sele; & alle isunde.
5008
We eow to-ȝerneð; ȝeue swiðe deore.
5009
þet ȝe us ȝiuen wifmen; to habben to wiue.
5010
þenne maȝe we heolden luue; to þissen leod-folke.
5011
Þa þis iherden Bruttes; heokerliche heom þuhte.
5012
& hehten heom faren awæi; & fleon of heore londe.
5013
for nolde heo heom ȝetten; þa þinges þe heo ȝernden.
5014
Peohtes weoren i-scende; & heore wæi forð wende.
5015
ham to heore cunne; & cudden heom heore erende.
5016
Heo nomen heore sonde; & sende to Irlonde.
5017
to þes londes kinge; Gille Caor ihaten.
5018
& biden hine heom senden; wifmen of his londe.
5019
Þurh þa ilke wifmen; þa þer wuneden longe.
5021
þat folc gan to spelien; Irlondes speche.
5022
& auer seoððen þa laȝen; wunieð a þan londe.
5023
swa heo beoð þere nu and æuere-mare.
5024
Hæfde Maurius þe king; god grið ȝeo[n]d his lond.
5025
a to his liue; his leoden weoren bliðe.
5026
Þa com þe ilke dæi; þat þe king dæd læi.
5027
forð com þes kinges sune; Coil wes ihaten.
5028
Þes wes ræh þes wes strong; þes wes stið an þonke.
5029
þes cuðe alle þa domes; þe stoden inne Rome.
5030
ah he ne luuede noht longe; þat wes his leodene hærm.
5031
ah þa while þe he luuede; his lond he huld a blisse.
5032
Hæfde Coil þe king; þe wes Bruttene aðel.
5033
enne leofue sune; Luces ihaten.
5034
þes wes þe bezste mon; þe auere hæfde kinedom.
5035
seoððen to Brutlonde com; Bruttes þe hit biwan.
5036
Luces wes kineboren; Luces wes wel itoȝen.
5037
& he wes swiðe blæð-fæst; Bruttes hine luueden.
5038
Moni wes þat gode þing; þat cuðe Luces þe king.
5039
nes þa na man vnder lufte; þe cuðe betere cræftes.
5040
Þurh þisne ilke æðele mon; vnder-fe[n]g þis lond Cristin-dom.
5041
þe mon þe wule lusten; hu hit ærest ilomp.
5042
þeos boc him wulle suggen; soððere wordes.
5043
hu Luces þe king; ærst Crist luuede.
5044
Men wel i-done; comen ut of Rome.
5045
comen to þan kinge; & talden him tiðende.
5046
of alle þere fore; þe Petrus dude in Rome.
5047
and whulcne martirdom; hauede vnder-fon.
5048
& þa oðere halȝen; þe mid Godde hah weoren.
5049
Þa longede swuðe; Luces þon kinge.
5050
ære he mare wuste; of þan Lauerd Criste.
5051
Þa weoren inne Rome; men wel idone.
5052
& an hali mon þer wes Pape; Elæudarius wes ihaten.
5053
Nom Luces þe king; of his leofuste monnen.
5054
sende to þa Papen; & feire hine gon greten.
5055
þet he senden him anan; sumne god-cunde mon.
5057
for þe king wolde wel don; & Cristes laȝen vnder-fon.
5058
libben mid rihte; & luuien his Drihte.
5059
he an alle his leoden; þe wuneden inne þissere þeoden.
5060
Þa þuhte Elæuðerie; þat tiðende swiðe murie;
5061
nes na mon on liue. þat weore al-swa bliðe;
5062
alse wes þe hali man. þa he þis iheren gon;
5063
Þe Pape hafden tweien biscopes. þe luueden Godes rihten;
5064
hider-wardes he heom senden. þa biscopes forð wenden;
5065
þat comen þa Godes sonden. in-to þissen londe.
5066
to Luces þon kingen; & to al his here-ðringen.
5067
Þa spac Dunian; & þe oðer biscop Fagan.
5068
seiden þan kinge lar-spel; & he hit hærcnede wel.
5069
ær þat lær-spel weoren idon; þe king ȝeornde Cristin-dom.
5070
& alle his duȝeþe-cnihtes. hit ȝeorde forð-rihtes.
5071
Þe king fulluht vnder-fe[ng]. & alle his gode men mid him;
5072
& alle his Bruttes. þe him buȝen wolden;
5073
& þa fulluht nulden vnder-fon. þe king heom letten fordon;
5074
Þa þis wes al idon. þa token heo oðer weise on;
5075
beiene þa biscopes. ferden ȝeond þas Bruttene;
5076
alle þa templen. þe þa heðene hafden itimbrid;
5077
Heo letten alle þa scrud at þere dure werpen vt;
5078
wascen þa waȝes. wel mid þan bezsten;
5079
þa nomen anlicnes. þe Mahun weoren ihatene;
5080
heo letten heom draȝen vt. oðer bi hondes oðer bi fot;
5081
heo heom letten swalen. inne swærte fure;
5082
Þa þis wes al idon. þa token heo oðer weiis on;
5083
heo ferde forð-rihtes. þurh Godes mihten;
5084
from stouwe to stouwe; & stureden heom-seoluen.
5085
hælȝeden alle þa templen; a þes Helindes nomen.
5086
Þa þet wes all i-don; þo token heo oðer weis on.
5087
þa setten heo biscopes; þan folken to dihten.
5088
þer-ouer ærchebiscopes þat clærcscipe to rihten;
5089
chirchen he letten areren. monie & wel iwhare.
5090
preostes heo þer setten; ase þer-to mihte semen.
5091
Þa þis wes al idon; þa token heo oðer weis on.
5092
þa com Luces þe king; & lond þer-to leide.
5093
& þa laȝen beoð a monie studen; al-swa Luces heom on dude.
5095
Naþeles heo weoren soððen; swiðe awæmmed.
5096
ladliche iniþered; þurh niðfulne craft.
5097
& eft heo weoren irihte; swa hit weolde Drihten.
5098
Þa alle þas þinges weoren idone; þa ferden þa biscopes to Rome.
5099
& bi-leæfden in þisse londe; þat folc a Godes heonde.
5100
