Layamon's Brut (British Museum Ms. Cotton Caligula A.IX)
Layamon

Lines 4901 through 5000

wið Claudien minne fader; þe wes þi cudliche freond.
     4901
þe dude þe þa wurhscipe; bi-tahte me þe to wiue. Page  256
     4902
& þu ært me swa leof; swa mi kine-lauerd.
     4903
Mi cun is her wið-vten; & þi kun her wið-innen.
     4904
Ȝif þu brekest þine quides; & mi cun quellest.
     4905
soð ich þe habbe iseid; wið þine sune þu beost iuæid.
     4906
& ȝif mi cun clembeð. & bi-neoðen þe ibringeð;
     4907
& þe seoluen & þin folc. falleð to grunde;
     4908
ȝif þu and þine þer wurðeð dæd. þeonne beo ich wið mine sune iued.
     4909
betere weore sæhte; þene swulc vnisibbe.
     4910
& bi-þenc þe of þan fore. hu þu mine fader swore.
     4911
to lasten alche ȝere; al to þine liue.
     4912
gauel in-to Rome; of þine kine-dome.
     4913
& ȝet ilæsteð þi lif; swa hit do longe.
     4914
for þi þu most holden; þat þu ær bihæhtest.
     4915
Al þa hered-cnihtes; heolden mid þere quene.
     4916
Þe king and alle his cnihtes; wakeden alle nihte.
     4917
al niht heo runden; whæt heom weoren to ræde.
     4918
Ne mihte heo finde nænne ræd; þe heom þuhte al swa god.
     4919
swa heom þuhte þe soðe quides; of þere quene.
     4920
A-marwe þa hit dæi wes. duȝeþen heom gereden;
     4921
to-gædere-ward heo uusden. alswa heo wolden fehten;
     4922
Forð com þa quene. & rad heom bi-tweonen;
     4923
ærst heo nom grið. & seoððen heo heom spac wið;
     4924
sette sæhtnesse. somnede cnihtes;
     4925
þa ær weoren ifeonde. makede heom to fronde
     4926
And þe king heom bi-hehten; his foreward to haldene.
     4927
& swa he hit ilæste; þe while þe he luuede.
     4928
Þus heo weoren sahte; & þus heo weoren some.
     4929
Þa wes þeos Bruttene; swiðe iblissed.
     4930
& Vaspasiæn and his iueren; al þat winter wuneden here.
     4931
from burie to burie; ferden mid blisse.
     4932
Anan swa seomer come; þa ferden heo to Rome.
     4933
Brut-lond wes bliðe; a to þeos kinges liue.
     4934
Nu hauede þe king Aruiragus; enne sune þe hehte Maurus.
     4935
he wes isende to Rome; to leornien in scole.
     4936
þer him wes swa wel idiht; he wes clærc & god cniht.
     4937
Þider him com sonde; ut of þissen londe.
     4938
þæt her nes nan rad; for þe king his fader wes dæd.
     4939
& he mosten cume sone; to his kine-dome.
     4940
Swa wes þat writ idiht; & he hit dude forð-riht. Page  258
     4941
to þisse londe he com; & under-feng þene kine-dom.
     4942
Wel riche wes Aruiragus; and mucle ricchere Maurius.
     4943
a þisse londe he heold grið; a þisse londe he hulde frið.
     4944
her wes blisse her wes mete; & alre godene mast.
     4945
A þissen ilken hit stod; þet com ouer sæ-flod.
     4946
an king þe hæhte Rodric; elche oðer unilic.
     4947
he com ut of Scice; elches londes vniliche.
     4948
he brohte mid him þe Peohtes; folc of muchele mahte.
     4949
Seoððen Rod[r]ic wes ærst mon; & he mihte uuel don.
     4950
a he ferde bi sæ-flod; & dude he uuel & næuere god.
     4951
monie hundreð buriȝe; he hæfde imakede blæðe.
     4952
He ferde bi sæ-stronde; into Scotlonde.
     4953
þat lond he al wæste; mid hermen þan meste.
     4954
þurh þat lond he ærnde; & hæ[r]ȝede and hærmde.
     4955
Comen þa tiðende; to Maurius þon kinge.
     4956
hu þe king Rodric; his ræflac makede.
     4957
Sone he sende sonde; ȝeond alle þisse kine-londe;
     4958
hæhte æuerælcne mon; þa his monscipe uðe.
     4959
þat he wel iwepned comen to hirede;
     4960
Þis folc wes isomned. and þe king fusde;
     4961
ferde into Scotlonde. þere he Rodric king fond;
     4962
Heo fuhten swiðe feondliche. & feollen þa Peohtes;
     4963
& Rodric þer wes of-slaȝen. & seoððen mid heorsen to-draȝen;
     4964
Þer dude Maurius þe king. a wel swuðe sællech þing;
     4965
uppen þen ilke stude. þer he Rodric uor-dude;
     4966
he lette a-ræren anan. enne swuðe sælcuð stan;
     4967
he lette þer-on grauen. sælcuðe run-stauen;
     4968
hu he Rodric. of-sloh. & hine mid horsen to-droh;
     4969
& hu he þa Peohtes. ouer-com mid his fæhtes;
     4970
Vp he sette þæne stan. ȝet he þer stondeð;
     4971
swa he deð al swa longe. swa þa woreld stondeð.
     4972
Nome him scupte þe king; & hehte þene stan West-mering.
     4973
a muchel dæl londes; þe þer lið abuten.
     4974
nom þe king to his hond; & hæhte hit West-merelinge lond.
     4975
Nu þu hafuest soð iherd; for wham hit swa hatte.
     4976
Þa þe þeo Peohtes; weoren ouer-cumne i þon fehte.
     4977
and Rodric wes dæd; & his iueren for-demed.
     4978
þa fluȝen þer bihælues; fiftene hundred.
     4979
þat weoren þa feirest men; þe weoren i þon fehte.
     4980
hæfden he to here-toȝe; enne hæh-iborene mon. Page  260
     4981
Þeos weolden heom iburȝen; & bi-halues fleon.
     4982
& buȝen vt of londe; to helpen heore liue.
     4983
Þat i-sehȝen þreo eorles; þe i þeon fehte weoren ohte.
     4984
whudere-ward þa ferde; heore flæm makeden.
     4985
Þe eorles heom siȝen to; mid selen heore cnihtes.
     4986
driuen heom in-to ænne hæhne wude; þer heo heærm þoleden.
     4987
Stod þe wund-liche wude; amidden ane wælde.
     4988
biuoren na bihinden; ne mihten þær nan at-winden.
     4989
ah alle hi heom nomen; & nane heo ne a-sloȝen.
     4990
fæste heom heo bunden; & brohten to þen kinge.
     4991
þat þe king heom sculden; don; oðer slan oðer hon.
     4992
Anan swa þe king heom spec wið; swa heo ȝeornden his grið.
     4993
ȝeorne heo hine beden; þurh his æd-meden.
     4994
þat he nomen heom to þrallen; & heo him wolden þiwien.
     4995
& heo him wolden beon liðe; a to heore liue.
     4996
Al þe king weorhte; also heo bi-sohten.
     4997
& heom an heond sælde; muchel dæl of londe.
     4998
al abuten Catenes; þer heo caðel wrohten.
     4999
Þat lond wes swiðe god; ah seoððen wes þe muchel flod.
     5000