Layamon's Brut (British Museum Ms. Cotton Caligula A.IX)
Layamon

Lines 4701 through 4800

Þus Port-chæstre to-ræs; & nauere seo[ðð]en heo ne aras.
     4701
þat heo swulc weore; swa heo wes eare.
     4702
Claudius þe keisere; mid wunderliche here.
     4703
ferde to Winchæstre; & bi-læi þa burh swi[ð]e feste.
     4704
Þer binnen wes Aruiragus; ærmliche biþrungen.
     4705
and muchel dæl of his cunne; of Bruttisce monnen.
     4706
Wa wes þon kinge Aruiragus; & to his cnihtes seide þus.
     4707
Suggeð me gode men; godfulle kempen.
     4708
wulle ȝe me helpen; mid hæhȝere strengðe. Page  246
     4709
her to biwinne; wurð-scipe minne.
     4710
Þa answereden; aðele cnihtes.
     4711
Nulle we þe bilæuen; for liue ne for dæðen.
     4712
On heo duden heore iweden; & leopen on heore steden.
     4713
cnihtes þer weoren swiðe iwhæte; heo dude[n] up þere burh-ȝæten.
     4714
heo makeden heore sceld-trome; þa scalkes weoren gode.
     4715
Weoren alle þa cnihtes; ȝærewe to þon fihte.
     4716
Þa somnede alle þa alde; þe to fehte heom scolde halden.
     4717
bi are halue heo riden; & spileden of ræde.
     4718
& nomen tweien cnihtes; & senden to þon kæisere.
     4719
& axeden wheðer he wolde grið; þe he wolde vnfrih.
     4720
Ær þer come mare lure; hefde he þene cure.
     4721
Þa andswerede Claudius; & wið þan cnihten he spec þus.
     4722
Wel is þe man nut; þe sæht-nesse wurcheð.
     4723
Ich æm ræh mon i-noh; Rome is min riche.
     4724
& alle þa londes; stondeð a mire honde.
     4725
þa biȝet me bi-uoren; Iulius þe kæisere.
     4726
& æfter mine dome; hæreð in-to Rome.
     4727
buten þes ilke kinedom; nulle me noht icnawen.
     4728
na þissere leodes folke; for lauerd me halden.
     4729
& me pugcheð muche scome; at mire heorte ic habbe grome.
     4730
ȝif Rome scæl for-leosen; þa while þe ich leouie.
     4731
heore muchele wurhscipe; þat mine ældere hire biwunnen.
     4732
For nare ȝitsunge; for nare ȝiuernesse.
     4733
ne com ich to þissen londe; to halden fiht stronge.
     4734
ne for nane plihte; buten to biȝiten mine rihte.
     4735
& ic heo wulle bi-winnen; oðer an wæle liggen.
     4736
Æ[c] cnihtes ȝit beoð hider icumen; from þon kinge Aruiragune.
     4737
Fareð swi[ð]e aȝen; to þan folc-kinge.
     4738
suggeð him to soðe; for hit cumeð him to cuðe.
     4739
þat ȝif he wule a leoð gan; & halden me for lauerde.
     4740
& he me wulle buȝen; þa bet him scal iwurðen.
     4741
ȝif he me wule sende; mine rihten of his londe.
     4742
ic hine wulle wurðien; mid wurhscipe muclen.
     4743
& suggeð him ful iwis; ich ȝifuen mine dohter Genuis.
     4744
to sibben & to some; þe bet wit mawen libben.
     4745
& ȝif he þis nule don; he scal wurs vnderfon.
     4746
faren wit swullen to-somne; & mid fehten hit to-dælen.
     4747
makien wæn-slæhtes; þænne beoð þe wurse. Page  248
     4748
Þa cnihtes wenden forð-riht; to þan folc-kinge.
     4749
cudden him soð quides; from Claudien þæn kæisere.
     4750
Þe king isæh þe neode; & droh to his ræde.
     4751
and he mid wurð-scipe; þas cnihtes awurðede.
     4752
þat he of his kinedome; wulde heren in-to Rome.
     4753
and seoððe wurðscipe him don; his dohter to quene vnder-fon.
     4754
To-gædere heo comen; and sæhten heo weoren sone.
     4755
& seoððen heo alle iwenden; i[n]-to Winchæstren.
     4756
þa weoren in þissen londe; blisfulle songes.
     4757
Heo wuneden inne Winchæstre; an and twenti wikene.
     4758
& senden to Rome ful iwis; æfter þan maidene Genuis.
     4759
Þat maiden mid isunde; com to þisse londe.
     4760
& Claudien þe kæisere; ȝæf heo þisse kinge.
     4761
ȝet hit is isene; þat heo wes her quene.
     4762
þat þe king [Aruiragus]; to quene hæfde Genuis.
     4763
Þes þinges weoren idone; and Claudien hæuede isend to Rome.
     4764
þa while iwende Claudius; & þe king Aruiragus.
     4765
into Orcaneiȝe; & þat lond al bi-læien.
     4766
ah muchel lond þer-abuten; al heo hit biȝeten.
     4767
two & þritti æit-lond; heo setten on heore aȝere heond.
     4768
heore grið heo setten fæste; and wenden to Winchæstre.
     4769
From Rome wes icumen ful i-wis; þat fæire maide Genuis.
     4770
isund & hire iuæren. sixti rideren;
     4771
þat maiden wes iwedded. þe king heo hafde to bedde;
     4772
Muchel wes þa blisse. þe wes þanne ((i)) Bruttene;
     4773
mid þan kinge Aruiragus. and þæn kæisere Claudius;
     4774
þa wes þis folk. swa bliðe. heo nære nauer ær on liue;
     4775
for þere muchele blisse. heo arærden enne burȝe;
     4776
an enne swiðe feire stude. uppe Sæuerne;
     4777
Þa þe burh wes al imaked. mid muchelere strengðe;
     4778
þa burh ȝæf Aruiragus. þæn kaisere Claudius;
     4779
and þat lond þer-abuten. muchel & noht lutel.
     4780
He hæhte setten hire on nome; þe hire mihte isemen.
     4781
hu þe king Aruiragus; nam to quene Genuis.
     4782
& þer þe king heo ȝef Claudiene; þan Romanisce kæisere.
     4783
Claudien þe heȝe. Kairclou heo hehte.
     4784
a[c] nas hit noht longe; þat þe nome moste stonden.
     4785
a[c] for Claudiusses wurð-scipe; swa wes þe nome iqueð%ðen.
     4786
Ah þa Claudius ærest in þissen londe com; he funde enne feire wimman. Page  250
     4787
heo wes witer heo wes wis; heo wes maiden ful iwis.
     4788
Claudienes cnihtes; heo bi-wunnen i þon fihte.
     4789
inne Port-chæstre; & heolden heo wel fæste.
     4790
& ȝeuen heo Claudiene; hit wes him swiðe iqueme.
     4791
& he hire rædde; & forð mid him ladde.
     4792
& leouede þe wimman; leofliche swiðe.
     4793
Þe wifman i-warð mid childe; bi Claudiene þan balde.
     4794
þa þet child wes iboren. wel wes Claudiene þer-foren;
     4795
Þa þe time wes ifulled. þat hit fulleht. sculde habben;
     4796
æfter þan [hað]ene laȝen. þat stoden o þen ilke dæȝen;
     4797
nome heo him aræhten. and Gloi þat child hahten;
     4798
Þis child wæx and wel iþæh. & muchel folc him to bah;
     4799
& Claudien him bitæhte. þa burh þe he ahte;
     4800