Layamon's Brut (British Museum Ms. Cotton Caligula A.IX)
Layamon

Lines 15401 through 15500

and imong al þan þrunge; þærsten him i þan ruge.
     15401
þat he brac ut bi-foren; under his breosten.
     15402
And forð he bi-wafde; þene pic he bilæfde. Page  806
     15403
and forð imong þan uolke; þa wes he al fere.
     15404
and wende him a-neoste; of þas kinges hirede.
     15405
æuere forð þene wæi; suð-riht alse he læi.
     15406
Þa he þus hafde idon; to Axcetre he bi-com.
     15407
þer he funde forð-rihtes; monie of his cnihtes.
     15408
and frei[ne]den ȝeorne; of his leod-kinge.
     15409
And Brien heom gon tellen; þat wil-spelles weoren.
     15410
and seiden þat Cadwaðlan; cumen wolde anan.
     15411
mid swa muchele uerde; of feole cunne ærde.
     15412
þat ne durste Edwine king; cumen to-ȝæines him naðing.
     15413
no in nauer nare burȝe; ne durste he him ibide.
     15414
Þat iherde Deuene and þa men of Deorchestre.
     15415
and þan Cornwælscen; wel heom wes on liuen.
     15416
Brien sende his s[o]nde; ouer sæ to Brut-londe.
     15417
and dude þan kinge to witen; aiðer bi worden and bi writen.
     15418
of alle his deden; and þat Pelluz wes on deðen.
     15419
and bad hine an hihȝende; comen to þissen londe.
     15420
& þe king duden swa; swa swiðe swa he mæhte.
     15421
And Brien sende sonde; in-to Suð-ham-tune.
     15422
and longien him to lette; his maðmes leoue.
     15423
& alle þa beornes anan; þe buȝen him to wolden.
     15424
comen aneouste; in-to Exchæstre;
     15425
and stið-imodede men; þa burh gunnen walden.
     15426
Cadwalan þat iherde; þe king wes ful bliðe.
     15427
and inne Brutaine; bonnede ferde.
     15428
þat he þreo hundred hauede; hæȝere scipene.
     15429
and al he hafden þer-to; þat heom bihouede.
     15430
And þe king Salomon; wide gon sende.
     15431
and forð he gon liðen; mid his Brutleoden.
     15432
þat is to iwitene; mid twa hundred scipene;
     15433
to helpen his cunne; Cadwaðlan kinge.
     15434
Weder stod an wille; wind mid þan bezste.
     15435
heo rihten heore loues; and up droȝen seiles.
     15436
liðen ouer sæ-stræm; swa sel þuhte heom.
     15437
Þa comen he to Tottenes; beien þa kinges;
     15438
Selemon þe sele; and Cadwalan þæ kene;
     15439
þat lond-folc wes bliðe; for heore leod-kinge. Page  808
     15440
Þa wes in Æst-londe; a king þe hehte Penda.
     15441
he ((b))iwuste a þan daȝen; þat folc of Merchene laȝen.
     15442
and he lufde Edwine; Edwine lufde hine.
     15443
and euere he wolde reden; Edwine to his neoden.
     15444
And Penda iherde suggen; soðere worden.
     15445
þat Brien heold Exchestre; biclused wið-innen. faste.
     15446
and þe king Penda. wide gon sende þa.
     15447
and sumede uerde. and forð him fusen;
     15448
& wenden to Exchastre. mid vnimete genge;
     15449
and bilæi uul faste; þa burh of Exchestre.
     15450
Brien þe wihte; mid twa hundred cnihte.
     15451
wes þer wið-innen; and þa burh wereden.
     15452
Sone þa tidende icumen wes; to þære hauene of Totenes.
     15453
to Caðwalane kinge; hu Brien wes bi-þrungen.
     15454
he lette blawen bemen; and bonnien his ferden.
     15455
& ferde æuere þene wæi; þæ touward Exchestre lai.
     15456
and delde a þreo ulockes; his duhti((e)) cnihtes.
     15457
and þus cleopien a-gon; þe king wes abolȝen.
     15458
Æuer-ælc god cniht; faren heom to forð-riht.
     15459
for we beoð cnihtes gode. mid wepnen wel idihte;
     15460
arude we Brien. þe is min ibore mon.
     15461
For ȝif heo nimeð Brien; heo hine wulleð aquelen.
     15462
and seoð[ð]en heo wulleð hine a-hon; and alle his i-feren for-don.
     15463
& us þer-after sone; mid alle heore imæh((te)).
     15464
To heo gunnen riden; gæres heo letten gl((i))den.
     15465
breken b((r))æde weiȝes; brustleden scaftes.
     15466
gold-uaȝe sceldes; scanden bilifes.
     15467
feollen þa cnihtes; faleweden nebbes.
     15468
ȝeond þan feldes wide; swulten men uæiȝe.
     15469
blod orn in þe weiȝe; strames swiðe brade.
     15470
þer neoren eorles; no wurðer þene cheorles.
     15471
Þer weoren þa of-slæȝene; seouen þusend fulle.
     15472
Marcchisce monnen; þa þer icumen weoren.
     15473
þa falden heo adune. heremarken uaȝe. Page  810
     15474
heo wurpen sceldes sone. dunede þa eorðe;
     15475
Þa sette to fleme; alre ȝeomerest folke.
     15476
and Cadwalan after heom; mid allen his imahten.
     15477
& mid his aȝene honden; nom þene king Pendan.
     15478
he wes Mærwales fader; Mildburȝe alde-uader.
     15479
Pendan heo nomen; and duden hine i benden.
     15480
wið-innen Excestre; and biwusten hine wel faste.
     15481
Swa sellic hit ferde; in alle þan uahte;
     15482
þat nas Pendan þe king; amarred nanes kunnes þing.
     15483
and Cadwalan hine biwuste; wel þurh alle custe.
     15484
and fæire heo hine uedde; and faire he eode to bedde.
     15485
Þa weoren agan seouen nih[t]; þa nom Pendan enne cniht.
     15486
þe wes swiðe wis mon; and wel cuðe speken;
     15487
and cleopede hine to rade; and seide him of his neode.
     15488
and ȝeorne hine bisohte; for lufe of ure Drihte.
     15489
þat he speke wi[ð] Cadwalan þe wes his kine-lauerd.
     15490
þat he hine griðede; þurh þene Godd heȝe.
     15491
and he wolde bi-cumen his mon; his mon-scipe hæhȝen.
     15492
dæiȝes and nihtes; he and al his cnihtes.
     15493
Þe cniht him forð wende; to Cadwalane kinge.
     15494
þer he hine imette; and fæire hine igrette.
     15495
and dude alse god mon; sel him wurðe for þan.
     15496
for a is treowe monnen; treouðe ihalden.
     15497
[H]al s[eo] þu Cadwalan; þu art mi kine-lauerd.
     15498
Þe ibundene king Penda; hider me gon sende.
     15499
& ȝerneð þine ære; nu and auere-mære.
     15500