Layamon's Brut (British Museum Ms. Cotton Caligula A.IX)
Layamon

Lines 15201 through 15300

and ȝaf him wickinge; ȝeond Irlonde.
     15201
Lette we nu beon Cadwaðlan. and ga we to Edwine aȝan.
     15202
Edwine in þissen londe; a-marden þas leoden.
     15203
burȝes he barnde; castles he ualde.
     15204
his here wrohte on londe; harmes vniuoȝe.
     15205
al Cadwaðlanes lond; he walde to his aȝere hond
     15206
Þa comen hauweres; to hire((de)) þas kinges.
     15207
and seiden tidende; Edwine kinge.
     15208
wa wrðe heom ((for)) þon; þat heo iboren weore.
     15209
saȝen heo him sæiden; of ane mæidenne.
     15210
þat wes Briennes suster hende; ueirest wifmonne.
     15211
heo wunede i Winchæstre; inne þan castle.
     15212
And Edwine mid his ferde; þider-ward wende.
     15213
sone swa he þider com; mid strenðe he heo nom.
     15214
ladden heo to Eouuerwic anan; cnihtes swiðe wel idon.
     15215
to bure me ladde; to þas kinges bedde.
     15216
Þe king dude vnwisdom; þat he þat ilke maide nom.
     15217
for þe wifmon a; wes þes ilke kinges iua.
     15218
Þa wunede i þan hirede; an clarc þe com from Spaine. Page  796
     15219
Pelluz wes ihaten; of heȝere laren.
     15220
feole craftes he cuðe; þa he isah in þan lufte.
     15221
on sterren and on sunne; and on þare sæ brade.
     15222
in-siht he cuðe; a winde and a mone.
     15223
of þan uisce þer he wlæt; and of wurmen þer heo crepe.
     15224
Cadwaðlan in Irlonde; gadere[de] genge.
     15225
and to scipe flutte; mid muchelre uerde.
     15226
Pelluz swiðe ueorre; isah on þan sterre.
     15227
þat ferde cumen wolde; uppen Ædwine kinge.
     15228
and Pelluz hine lerde;
     15229
hu he þas leoden mihtte. alre bezst bi-witen;
     15230
Ba bi londen and bi scipen. Cadwaðlan and his men;
     15231
ofte gunnen fusen. to cumen to þissen londen.
     15232
biuoren wes æuere Edwine; and þa hafne heom for-warnde.
     15233
þurh Pelluces lare; ne mihten heo cumen here.
     15234
Wa wes Cadwalan; þat he wes on liuen.
     15235
for he bigon þene swike-dom; uppen his sweord-broðe[r]en.
     15236
and þer-uore him-self hafde; hærm þene meste.
     15237
Cadwalan him to cleopede; his bezste cnihtes alle.
     15238
and seide þat he wolde; wende to Brutaine.
     15239
and þene king iseon; þe Salemon wes ihaten.
     15240
an heorte him weore þe selere; for heo weoren isibbe.
     15241
heo weoren of ane cunne; þa kinges beiȝe tweien.
     15242
Bruttes heo weoren beine; ah swiðe heo weoren un-balde.
     15243
Cadwaðlan to scipen com; and seh forð mid uðen.
     15244
and seilede after vðe; unsel him wes on mode.
     15245
to ane æit-londe heo bicomen; þat stondeð bi Gernemuðe.
     15246
likede swa heom likede; þer heo gunnen wikie.
     15247
þer heo abiden wederes; for þe wind heom stod to-ȝæines.
     15248
Þa iwarð þe king þere; isæcled ful swiðe.
     15249
and hafde þat uuel hate; binumen hi[m] wes þa hele.
     15250
Þa niȝen dæȝes weoren aȝeong; þe king wes swiðe un-strong.
     15251
þa wes ((he)) wræccheliche of-lust; after deores flæsce.
     15252
Brien his mæi he cleopede; and sone hit him cudde.
     15253
þat buten he hafde deores flasc anan; dæd he moste þolien.
     15254
Ofte wes Briene wa; and neouuere wurse þene þa. Page  798
     15255
hundes nom Brien; and hired-men wel idon.
     15256
ȝeond wudes & ȝeond feldes; heo uerden bi-lifes.
     15257
þurh nanes cunnes ginne; no mihten heo deor iwinne.
     15258
nouþer heort no hinde; no mihte heo nauere ifinde.
     15259
Þe king sende his sonde; after Brien þa wes to longe.
     15260
Leof was þe king Briene; wa wes him on liue.
     15261
Ofte he hine biðohte; what he don mahte.
     15262
and biþohten him enne ræd; seoððen he þohten him swi[ðe] god.
     15263
he igrap a nail-sax; sel-liche kene. and wel iwhæt.
     15264
and feng him-seolue swa neh; þat he nom his aȝe þeh
     15265
for unimete neode; þer-of he makede brede.
     15266
he bredde heo an hiȝinge; and brohte heo þan kinge.
     15267
Hail seo þu Cadwaðlan; þu ært mi kine-lauerd.
     15268
ich habbe þe here i-broht; breden alre deorest.
     15269
þat ich auere an æi borde; beren bi-uoren kinge.
     15270
held me to and æt her-of sone; þin hele heo scal iwurðen.
     15271
Þe king sæt on his bedde; his beornes hine biheolde.
     15272
of þere brede he æt; sone þer-after him wes þæ bet.
     15273
Þe king him gon to sweten; þat ufel hine gon for-leten.
     15274
wið-innen þan fif niht; þe king iwræð fere forð-riht.
     15275
swa næuer þe king nuste; whæt he inoted hafde.
     15276
Þe king iwræð al uere; his folc iwarð bliðe.
     15277
wind heom com on wille; heo wunden up seiles to coppe.
     15278
scipen gunnen liðen; leod-scopes sungen.
     15279
Ba weoren sehte; sæ & þa sunne.
     15280
wind and þa wide se; ba eke isome.
     15281
flod ferede þa scipen; scopes þer sungen.
     15282
At Ridelæt he com alond; þer wes blisse & muche song.
     15283
bitwixe Dinan & þere sæ; ȝet hit is isene.
     15284
Sone swa he þer com; feire he wes under-uon.
     15285
þa kinges weoren bliðe; beiene to-gaderes.
     15286
þer wunede þe king; al þene winter a skenting.
     15287
þer-after com leinten; and dæȝes gunnen longen.
     15288
þer heo gunnen somnien; scipen uniuoȝen.
     15289
folc unimete; grunden an uolde;
     15290
Þus dude Cadwalan; and Peluz hit wuste a-nan.
     15291
þurh his dweomer-cræften; þe wunede in þan lufte. Page  800
     15292
and al þat he auunde; in þan lufte & bi þan grunde.
     15293
þurh ælches cunnes þing; he warnede æuere Ædwine king.
     15294
and dude him al to witen; of þare uerde; & of þan scipen.
     15295
Cadwaðlan wes in Brutaine; mid Salemone þan kinge.
     15296
þe wes his moddrie sune; and muchel hine. lufede.
     15297
& þat iherde suggen; wel feole siðen.
     15298
þat Pelluz þe hende; þe com ut of Spaine.
     15299
warnede Edwine þene king; æuer þurh alle þing.
     15300