Layamon's Brut (British Museum Ms. Cotton Caligula A.IX)
Layamon

Lines 14401 through 14500

Þa com an of his cunne; Carric wes ihaten.
     14401
and nom þisne kine-dom. and mid seorȝen wunede þer-on.
     14402
snel cniht wes Carric; ah he nes noht iseli.
     14403
þat wes for un-leoden; spilden al his þeoden.
     14404
Þeos king wes aðel Bruttisc mon; hux and hoker me warp him on.
     14405
he for-lætte Carriches; & Kinric hine cleopede.
     14406
and ȝet on feole bocken; his nome me swa writeð.
     14407
Folc hine gunnen hænen; folc hine gunne hatien.
     14408
and hoker loð sungen; bi laðen þan kingen.
     14409
Þa bigon weorre; ouer al þissen arde.
     14410
and Sexisce men sone. seileden to londe.
     14411
and herberȝe token a-neouweste; bi-ȝeonde þere Humbre.
     14412
and þe king wæilien agon; wide ȝeon þas þeoden.
     14413
læð he wes al folke; þa him on lokede. Page  758
     14414
Þa wes in Aufrike a king swiðe riche.
     14415
he wes an Aufrican; Anster ihaten.
     14416
he hafde sonen tweien; snelle cnihtes beien.
     14417
Gurmund hehte þe eldere; & Gerion hehte þe ȝeongere.
     14418
Þe alde king deȝede; his daȝes weoren aȝeongen.
     14419
he bitahte his sune Gurmunde; selen his riche.
     14420
Ah Gurmund hit for-hoȝede; and habbe he heo nolde.
     14421
and þohte al oðer; and ȝef heo his bro[ð]er.
     14422
and seiden þat he nolde; aȝen nane riche.
     14423
bute he heo biwunne; mid wepnen and mid monnen.
     14424
ah mid compe he wolde; aȝen kineriche.
     14425
oðer nauermare; nolde he habbe nane.
     14426
Gurmund was kempe; i-costned on mæine.
     14427
and he wes þe strongeste mon; þæ æi mon lokede on.
     14428
He bi-gon to sende; ȝeond al þan londe.
     14429
in-to Babilonie; in-to Macedonie.
     14430
in Turkie. in-to Persie.
     14431
in-to Nubie. in-to Arrabie.
     14432
& bad alle þe ȝeonglinges; ȝeond þa hæðene londes.
     14433
þat heo heom biȝeten; wurðliche wepnen.
     14434
and he heom forð-rihtes; wolden makien cnihtes.
     14435
and seo[ð]ðen mid heom wenden; and fonden whar he mihten.
     14436
mid strongen kempen; biwinnen kineriche.
     14437
Hit halde touward Aufrike of ((feole)) kuneriche.
     14438
monies riches monnes sune; monie haðene gume.
     14439
comen to Gurmunde; þan hæðene þringe.
     14440
Þa þis ferde wes isomned; and his folc arimed.
     14441
þa weoren þer italde; cnihtes swiðe balde.
     14442
an hundred and sixti þusend; f((r))eoliche iwapned.
     14443
wið-uten heore scutten; þa biuoren scolden scuuen.
     14444
wið-uten þan craftmonnen; þe comen to Gurmunde.
     14445
Forð heo iuusden; vnimete uerden.
     14446
to þare se wenden; þa heo wind hafden.
     14447
in-to scipe halden; haðene kempen.
     14448
Seouentene þer foren; þat kinges sunen weoren.
     14449
þer weoren twenti and æhten; of eorlene streone. Page  760
     14450
suipten from londe; seouen hundred scipene.
     14451
a formeste flocke; wið-uten þa feoliende.
     14452
Forð flet mid vðe; folc vnimete.
     14453
þa æit-londes allen; þa heo biforen funden.
     14454
alle heo eoden an honde; þan kinge Gurmunde.
     14455
moniane kinge he faht wið; and alle heo ȝirnden his grið.
     14456
& alle þe londes he biwon; þat he lokede on.
     14457
And þa a þan ende; he com to Irlonde.
     14458
and þat lond he al biwon; and aqualden þa leoden.
     14459
and wes icleoped king þere; of þan kine-londe.
     14460
& seo[ð]ðen he gon wende; in-to þissen londe.
     14461
seil heo droȝen to hune; and comen to Suð-hamtune.
     14462
Þa wunede bi-ȝeonde þere Hunbre; of Hengestes cunne.
     14463
in þan norð ende; drenches sume sixe.
     14464
heo iherden tiðinde; of Gurmund þan kinge.
     14465
ofte heo heom biþohte; what heo don mihten.
     14466
hu heo mihten biswik[e]n; Karic of his richen.
     14467
and Bruttes alle aquellen; mid luðeren heore craften.
     14468
Sexisce men senden sonde; to Karic þan king.
     14469
and seiden þat heo wolden; wið hine grið i-wurchen;
     14470
leofere heom weore; to here Karic
     14471
þene Gurmunde. þan vncuðe kinge;
     14472
ȝef he heom wolde gri[ð]ien; þat heo mosten liuien.
     14473
& aȝeuen heom þat lond; þat while Uortigerne þe king;
     14474
Hengeste bitahte. þa he nom his dohter leoue;
     14475
and heo him wolden senden; gauel of þan londe.
     14476
halden hine for hehne king; Karic heore deorling.
     14477
& þis heo him to-ȝeornden; mid ȝislen to isoðien.
     14478
And Karic heom ilefde; al heore leosinge.
     14479
and þis grið ȝette; and dai heom sette.
     14480
Þa wes Karic biswiken; al mid heore craften.
     14481
Karic auer seoðen; Kine-ric he hehten.
     14482
al mid hoker-worden; þe king heo for-husten
     14483
Karic ileouede to soðe; Sexisce monne lare.
     14484
Vnder þan worden; heo letten writ makien.
     14485
& senden heore sonden; to Gurmunt þen kinge. Page  762
     14486
and þus þa word seiden; þa a þan writ stoden;
     14487
Hail seo þu Gurgmund; hal seo þu heðene king.
     14488
heil seo þi duȝeðe; hail þine drihtliche men.
     14489
We sunden men Sexisce; selest of þan kunne.
     14490
þa Hengest of Sex-londe; hider mid him brohte.
     14491
wunieð inne Brutaine; bi norðe þere Humbre.
     14492
þu art heðene king; we heðene kempen.
     14493
Karic is Cristine mon; he is us lað forðan.
     14494
and ȝif þu wult al þis lond; nimen to þire aȝere hond.
     14495
we wulleð mid þe uehten; mid f((u))llere strenðen.
     14496
and Caric of-slæn and alle his cnihtes flan;
     14497
& setten al þis kine-lond; a þire aȝere ((hond)).
     14498
ȝif þu hit wult us a-ȝiuen; we þe wulleð ȝelden.
     14499
sixti hundred punden; to alches ȝeres firsten.
     14500