Layamon's Brut (British Museum Ms. Cotton Caligula A.IX)
Layamon

Lines 13901 through 14000

& þider i-beren lette; Luces þene kaisere.
     13901
and lette hine bitillen; mid gold-faȝe pallen.
     13902
and bi-witen hine þer lette; þreo daȝes fulle.
     13903
þe while he wurchen lette; an werc swi[ðe]riche. Page  730
     13904
ane cheste longe; and wreon heo al mid golde.
     13905
And lette leggen þer-inne; Luces of Rome.
     13906
þat wes a swiðe duhti mon; þa while his daȝes ilasten.
     13907
Þa ȝet dude Arður mære; aðelest alre Brutte.
     13908
Arður asechen lette; alle þa riche.
     13909
kinges and eorles; and þa riccheste beornes.
     13910
þa i þan fehte weoren i-slaȝen; and idon of lif-dæȝen.
     13911
he lette heom burien; mid baldere pruten.
     13912
Buten þreo kinges; he beren lette. Luces þan kaisere.
     13913
and lette makien beren; riche and swiðe maren.
     13914
and lette heom sone; senden to Rome
     13915
and grette Rom-weren alle; mid græten ane huxe.
     13916
and seide þat he heom sende; þat gauel of his londe.
     13917
and efte wold heom al-swa; senden heom gretinge ma.
     13918
ȝif heo ȝirnen wolden; of Arðures golden.
     13919
and þer-after wulle sone; riden into Rome.
     13920
and tellen heom tiðinge; of Brutlondes kinge.
     13921
and Rome walles rihten; þe ȝare weoren to-fallen.
     13922
And swa ich wulle ((awelden)); þe wode Rom-leoden.
     13923
Al þis ȝelp wes idel i-do; for eoðer weis hit eode.
     13924
al oðer hit itidde; þe leoden he bilæfden.
     13925
al þurh Modred is mæin; for-cuðest alle monnen
     13926
A þan muchele fihte; Arður of his cnihtes losede;
     13927
fif and twenti þusend. a uolden to-hav%wen;
     13928
of Brutten swiðe balde; biræued at liue;
     13929
Kæi wes forwunded seore; wunder a swiðe.
     13930
to Kinun he wes ilad; and sone þer-after he wes ded.
     13931
bi-bured he wes þere; bi-halue þan castle.
     13932
i-mong heremiten. þat wæs þe riche mon;
     13933
Kæi hehte þe eorl. Kinun þe castel.
     13934
Arður ȝæf him þene tun; and he þer-to tumde;
     13935
and sette þer þene nome. after him-seoluen.
     13936
for Keises dæðe; Kain he hit hehte.
     13937
nu and auere mare; swa hit hehte þere.
     13938
Seoððen Beðuer wes islæȝen; and i-don of lif-dahȝen.
     13939
Arður hine beren lette; to Bæios his castle.
     13940
and biburied he wes þere; inne þere burȝe. Page  732
     13941
wið-uten þan suð ȝæte; in eorðe me hine sette.
     13942
Howeldin iulut wes; forð into Flandres.
     13943
and alle his bezste cnihtes; þer flutten uorð-rihtes.
     13944
in-to þan eorldomen; þenne heo þer comen.
     13945
and alle þa dede; in eorðe me heom leide.
     13946
inne Teruane; heo liggeoð alle clane.
     13947
Leir þene eorl me ladde; in-to Buluine.
     13948
& Arður þer-æfter seoððe; wunede in ane londe.
     13949
inne Burguine. þer him bezst þuhte;
     13950
Þat lond he al biwuste. and alle þe castles sette.
     13951
and seide þat he wolde; him-seolue þat lond holde.
     13952
And seoððen he his beot makede; a sumere þat he wolde.
     13953
faren into Rome; & ahnien al þa riche.
     13954
and beon him-seolf kaisere; þe Luces wuneden ære.
     13955
And monie of Rom-leoden; wolden þat hit swa eoden.
     13956
for heo weoren a-dradde; to heore bare deðe.
     13957
þat monie þer awæi fluȝen; and heore castles bibuȝen.
     13958
and monie sende sonde; to Arðure þan stronge.
     13959
and monie him speken wið; & ȝirnden Arðures grið.
     13960
and summe heo wolde; aȝein Arðure halden.
     13961
and halden wið him Rome; & weren þa leode.
     13962
And neoðeles heo auered weoren; for heore uæie-siðen.
     13963
þat nusten heo under Criste; nenne ræd godne.
     13964
Þa wes hit itimed þere; þat Merlin saide while.
     13965
þat Rom-walles sculden; aȝein Ar[ð]ure to-uallen.
     13966
þat was agan þære; bi þan kaisere.
     13967
þa ueol þer-inne fehte; mid fifti þusund monne.
     13968
ruren þer to grunde; riche Rom-leoden.
     13969
Þa Arður wende to soðe; to aȝen al Rome.
     13970
& wunede inne Burguine; richest alre king.
     13971
Þa com þer in are tiden; an oht mon riden.
     13972
and brohte tidinge; Arðure þan kinge.
     13973
from Moddrede his suster sune; Arðure he we((s)) wilcume.
     13974
for he wende þat he brohte; boden swiðe gode.
     13975
Arður lai alle longe niht; and spac wið þene ȝeonge cniht.
     13976
swa nauer nulde he him sugge; soð hu hit ferde.
     13977
Þa hit wes dæi a marȝen; and duȝeðe gon sturien. Page  734
     13978
Arður þa up aras; and strehte his ærmes.
     13979
he aras up and adun sat; swulc he weore swiðe seoc.
     13980
Þa axede hine an uæir cniht; Lauerd hu hauest þu iuaren to-niht.
     13981
Arður þa andswarede; a mode him wes uneðe.
     13982
To-niht a mine slepe; þer ich læi on bure.
     13983
me imætte a sweuen; þer-uore ich ful sa((ri)) æm.
     13984
Me imette þat mon me hof; uppen are halle.
     13985
þa halle ich gon bi-striden; swulc ich wolde riden.
     13986
alle þa lond þa ich ah; alle ich þer ouer sah.
     13987
and Walwain sat biuoren me; mi sweord he bar an honde.
     13988
þa com Moddred faren þere; mid unimete uolke.
     13989
he bar an his honde; ane wiax stronge.
     13990
he bigon to hewene hardliche swiðe.
     13991
and þa postes for-heou alle; þa heolden up þa halle.
     13992
Þer ich iseh Wenheuer eke; wimmonnen leofuest me.
     13993
al þere muche halle rof; mid hire honden heo to-droh.
     13994
Þa halle gon to hælden; and ich hæld to grunden.
     13995
þat mi riht ærm to-brac; þa seide Modred Haue þat.
     13996
Adun ueol þa halle; & Walwain gon to ualle.
     13997
and feol a þere eorðe his ærmes brekeen beine.
     13998
& ich igrap mi sweord leofe; mid mire leoft honde.
     13999
and smæt of Modred is hafd þat hit wond a þene ueld.
     14000