Layamon's Brut (British Museum Ms. Cotton Caligula A.IX)
Layamon

Lines 13801 through 13900

al swa Riwadðlan; ræsde to his feonden.
     13801
Al heo hit sloȝen; þat heo aneh comen.
     13802
þe while þe heo mihte walden; heoren kine-wurðe wepnen.
     13803
neouren in al þan fihte; cnihtes nane betere.
     13804
þe while þat heom ilaste; þat lif on heore breoste.
     13805
Boccus þene king heo of-sloȝen; and a þusend of his cnihten.
     13806
Þa wes Beduer awræken; wel mid þan bezsten.
     13807
Þer wes an oht eorl; aðeles cunnes.
     13808
Leir wes ihaten; lauerd of Buluine.
     13809
he isæh i þan fihte; enne ueond fusen.
     13810
þat on admirail; of Babiloine he wes ældere.
     13811
muchel uolc he aualde; uolde to grunde.
     13812
And þe eorl þat bihædde; an heorte him was unneðe.
     13813
he bræid an his breoste; ænne sceld bradne.
     13814
and he igrap an his hond; a sper þat wes swiðe strong.
     13815
& his hors muneȝeden; mid alle his imaine.
     13816
and þene admiral hitte; mid smærten ane dunte.
     13817
vnder þere breoste; þat þa burne gon to berste.
     13818
þat him þer bæfte; þat sper þurh-ræhte.
     13819
fulle ane ueðme; þe ueond feol to grunde.
     13820
Þat isah sone; þeos admirale sone;
     13821
Gecron is ihate. and his spere grap anan;
     13822
and smat Leir þene eorl sære. a þa lift side;
     13823
þurh-ut þa heorte. þe eorl adun halde.
     13824
Walwain þat bihedde; þer he wes on uehte
     13825
and he hine iwraðede; wunder ane swiðe.
     13826
þat isæh Howel; hæh mon of Brutten.
     13827
and he þider halde; mid fif-tene hundred monnen;
     13828
herde here-ke[m]pen. mid Howele fusden.
     13829
and Walwain heom uuenon; swiðe stið-imoded mon.
     13830
he hefde to iferen; fif and twenti hundred; Page  726
     13831
baldere Brutten. þa bigunnen heo to fehten;
     13832
Þer weoren Rom-leoden; reouliche. iledde.
     13833
Howel heom kepte; Walwain heom imette.
     13834
þer wes wunderlic grure; þa welcnen aqueðen.
     13835
þa eorðe gunnen to buuien. stanes þer bursten;
     13836
urnen stremes of blode. of ærmen þan folke.
     13837
þat wel wes unimete. þa weoren Bruttes werie;
     13838
Kinard þe eorle of Strugul; bilefde þene king Howel.
     13839
& inom mid him Labius Rimarc & Boclouius.
     13840
Þis weoren þa keneste men; þat æi king ahte.
     13841
þeos weoren on mon-cunne; eorles main stronge.
     13842
Heo nalden for heore mucle mode. fulien Howele þan gode.
     13843
ah bi heom-seoluen heo sloȝen; alle þe heo neh come.
     13844
Þat isæh a riche mon; of þan Rom-leoden.
     13845
hu Kinard þe kene; heore uolc þer aqualde.
     13846
and þe cniht gon him alihten; of leofuen his steden.
     13847
and nom him on his honde; a spere imaked of stele.
     13848
& bi-walede hine a blode; & bi-halues him eode.
     13849
þat he com a þan ende; þer fæht Kinard þe stronge.
     13850
Kinardes burne he up ahof; and he þene eorl þer of-sloh.
     13851
Þa ȝeiden lude; alle Rom-leode.
     13852
and buȝen to þan Brutten; & heore trume breken.
     13853
& feollen here-marken; uolc adun helden.
     13854
sceldes þer scenden; scalkes. þer feollen.
     13855
þer ueollen to grunde; fiftene þusende.
     13856
baldere Brutten; balu þer wes riue.
     13857
Swa ilaste longe; þat uiht swiðe stronge.
     13858
Walwain gon ȝeonge; ȝeond þat wæl muchele.
     13859
and somnede his cnihtes alle; þer he heom funde i fihte.
     13860
Aneouste þer com ride; Howel þe riche.
     13861
heo somneden heore beire uolc anon; & forð heo gunnen fusen.
     13862
and riden to Rom-leoden. mid raȝere wraððen.
     13863
& fastliche heom to buȝen; and breken þere Freinsce trumen.
     13864
And Walwain forð-rihte; þer he ifunde
     13865
Luces þene kaiser. leouien under scelde.
     13866
& Walwain him to sweinde; mid þe stelene sweorde.
     13867
and þe kaisere hine; þat [g]om[e] wes swi[ðe] sturne. Page  728
     13868
sceld aȝein scelden; sciuren þer wunden.
     13869
sweord aȝein sweorde; sweinde wel ilome.
     13870
fur fleh of þe stelen; þa ueond weoren abolȝen.
     13871
Þer wes viht swiðe strong; stureden al þa ferden.
     13872
þe kaisere wende; Walwain to scende;
     13873
þat he miht an uuere daȝe; ȝelpen uor þere deden.
     13874
Ah Bruttes him þrungen to; þræfliche swiðe
     13875
& þa Romanisce men; arudden heore kæiseren.
     13876
and heo to-somne heolde; swulc heouene wolde ualle.
     13877
Alle þene dai-liht; heo heolden seoððen þat fiht.
     13878
ane lutle stunde; ær þe sunne eode to grunde.
     13879
Arður þa cleopede; aðelest alre kinge.
     13880
Nu we heom to alle; mine cnihtes ohte.
     13881
& Godd seolf us fulste; ure feond to afallene.
     13882
Æfne þan worden; þa bleou men þa bemen.
     13883
fiftene þusend anan; þraste to blauwen.
     13884
hornes and bemen; þa eorðe gon beouien.
     13885
for þan vnimete blase; for þan mucle ibeote.
     13886
Romleoden wenden; rug to þan feohten.
     13887
feollen here-marken; heȝe men swulten.
     13888
fluȝen þa þe mihten; þa ueie þær feollen.
     13889
Muchel mon-slæht wes þere; ne mihte hit na man tellen.
     13890
hu feole hundred monnen; to-heouwen þer weoren.
     13891
i þan mucle þrunge; i þan mon-slæhte.
     13892
Wes þe kaisere of-slæȝen; a seolcuðe wisen.
     13893
þat nuste hit nauer seoðen; na mon to sugen.
     13894
of nauer nare cuð[ð]e wha þene kaisere qualde.
     13895
Bute þa þet feht was al idon; and þat folc wes al iblissed.
     13896
þa funde men þene kaisere; of-stungen mid ane spere.
     13897
Word com to Arðure; þer he wes on telde.
     13898
þat þe kaisere wes of-slaȝen; and i-don of lif-dæȝen.
     13899
Arður lette slæn an teld; a-midden ænne bradne ueld.
     13900